بغداد : (ویب ڈیسک) اقوام متحدہ کے سیکرٹری جنرل انتونیو گوتریس چھ سال بعد اپنے دورہ عراق کے لئے بغداد پہنچ گئے۔
غیر ملکی خبر رساں ادارے کے مطابق سیکرٹری جنرل اقوام متحدہ اپنے دورہ عراق کے دوران آج عراقی وزیر اعظم محمد شیعہ السوڈانی سمیت خواتین اور نوجوانوں کے حقوق کے گروپوں کے نمائندوں سے ملاقات کریں گے جبکہ کل شمالی عراق میں بے گھر ہونے والے افراد کے کیمپ کا دورہ کریں گے اور بعدازاں عراقی کردستان کی علاقائی حکومت کے نمائندوں سے ملاقات کے لیے اربیل جائیں گے۔
انتونیو گوتریس نے عراق پہنچنے پر اپنے پیغام میں کہا کہ وہ عراق کے عوام اور جمہوری اداروں کے ساتھ یکجہتی کا مظاہرہ کرنا چاہتے ہیں جس کا مطلب ہے کہ اقوام متحدہ اس ملک میں اداروں کے استحکام کی حمایت کے لیے پوری طرح پرعزم ہے۔
انہوں نے مزید کہا کہ انہیں یقین ہے کہ عراق کے عوام کھلے اور جامع مذاکرات کے ذریعے ان مشکلات اور چیلنجوں پر قابو پا لیں گے جن کا انہیں اب بھی سامنا ہے۔
یاد رہے کہ سیکرٹری جنرل اقوام متحدہ نے اس سے قبل 2017 میں عراق کا دورہ کیا تھا۔
گوتریس دورہ عراق کے بعد قطر جائیں گے جہاں وہ ایک اہم اجلاس میں شرکت کریں گے۔
