لاہور، کوئٹہ: (ویب ڈیسک) شمالی بلوچستان میں کوژک ٹاپ، پرانا چمن، شیلا باغ اور توبہ اچکزئی میں برف باری کا سلسلہ جاری ہے، آج سے شدید ترین سردی کی لہر کا امکان ہے۔ کوژک ٹاپ کے مقام پر برفباری کے باعث کئی گاڑیاں پھنسنے کے بعد انتظامیہ کی جانب سے سینکڑوں گاڑیوں کو ریسکیو کر لیا گیا۔ شدید ترین سردی کے باعث کوئٹہ، چمن شاہراہ پھر سے منجمد ہوئے گئی جبکہ کوئٹہ، زیارت شاہراہ پر بھی ٹریفک کی روانی متاثر ہو گئی ہے۔ دوسری جانب پنجاب میں ایک بار پھر دھند نے زور پکڑ لیا ہے، شدید دھند کے باعث حد نگاہ متاثر ہونے سے کئی مقامات پر موٹرویز ٹریفک کیلئے بند کردئیے گئے۔ موٹروے پولیس کے مطابق ملتان موٹروے فیض پور سے جڑانوالہ تک اور موٹروے ایم 11 محمود بوٹی سے شاہدرہ، کالا خطائی انٹر چینج تک ٹریفک کیلئے بند کردی گئی ہیں۔ موٹروے ایم 2 لاہور سے ہرن مینارتک جبکہ لاہور سیالکوٹ موٹروے کو بھی محمود بوٹی سے کالا خطائی انٹر چینج تک بند ٹریفک کیلئے بند کر دیا گیا ہے۔
