کیف: (ویب ڈیسک) یوکرین کے صدر ولادمیر زیلینسکی نے انٹیلی جنس ایجنسی کے سربراہ اور پراسیکیوٹر جنرل کو عہدوں سے ہٹا دیا ہے۔
غیر ملکی خبر ایجنسی کے مطابق صدر ولادمیر زیلیسنکی نے یہ فیصلہ انٹیلی جنس ایجنسی ایس بی یو اور پراسیکیوٹر جنرل آفس میں بغاوت کے کئی کیسز سامنے آنے کے باعث کیا ہے۔ یوکرین کے صدر نے اپنے ویڈیو بیان میں کہا کہ ملکی سلامتی کے دو اہم ستونوں میں سنگین نوعیت کے جرائم کا سامنے آنا ان اداروں کے سربراہوں کے کردار پر سنجیدہ سوالات کو جنم دیتا ہے۔
انہوں نے کہا کہ قانون نافذ کرنے والے اہلکاروں کے خلاف مجوعی طور پر بغاوت اور اس میں معاونت کے 650 سے زائد مقدمات درج کرکے تحقیقات کا آغاز کر دیا ہے، دونوں اداروں کے 60 سے زائد سابق ملازمین روس کے زیر تسلط علاقوں میں یوکرین کے خلاف کام کر رہے ہیں۔
عہدوں سے فارغ ہونے والے یوکرین کی انٹیلی جنس ایجنسی کے سربراہ اور پراسیکیوٹر جنرل کی جانب سے کسی قسم کا ردعمل سامنے نہیں آیا ہے۔
دوسری جانب یوکرینی صدر کے مشیر نے میڈیا سے گفتگو کرتے ہوئے واضح کیا کہ انٹیلی جنس سربراہ اور پراسیکیوٹر جنرل کو برطرف نہیں کیا گیا، بلکہ محض عہدوں سے ہٹایا گیا ہے۔
انہوں نے کہا کہ دونوں اداروں کے ملازمین کے خلاف تحقیقات جاری ہیں، جس کے باعث ان کے سربراہان کو عہدوں سے ہٹایا گیا ہے تاکہ وہ تحقیقات میں اثر انداز نہ ہوسکیں۔
