لندن: (ویب ڈیسک) ملکہ برطانیہ الزبتھ دوم کی تخت نشینی کی پلاٹینیم جوبلی کی چار روزہ تقریبات کا آغاز ہوگیا ہے۔
برطانوی ملکہ نے تخت نشینی کے 70 سال مکمل ہونے پر ان تمام افراد کا شکریہ ادا کیا جو پلاٹینیم جوبلی تقریبات کا حصہ بنے ہیں۔
دنیا بھر سے لاکھوں افراد 2 جون سے شروع ہونے والی تقریبات میں شرکت کریں گے۔
96 سالہ ملکہ الزبتھ دوم برطانیہ میں سب سے زیادہ عرصے تک تخت نشین رہنے والی شخصیت ہیں۔
ملکہ برطانیہ کی جانب سے جاری بیان میں کہا گیا کہ برطانیہ سمیت کامن ویلتھ ممالک کے ان تمام افراد کا شکریہ جو پلاٹینیم جوبلی تقریبات کا حصہ بن رہے ہیں۔
ان تقریبات کا آغاز پاکستانی وقت کے مطابق دوپہر میں 2 بجے فوجی پریڈ سے ہوا۔
اس موقع پر ملکہ برطانیہ شہزادہ چارلس، شہزادہ ولیم اور شاہی خاندان کے دیگر افراد کے ہمراہ بکنگھم پیلس کی بالکونی میں آئیں جہاں انہیں گھڑ سوار دستے نے سلامی پیش کی۔
تقریبات کے دوران توپوں کی سلامی بھی دی جائے گی جبکہ شام کو ملکہ برطانیہ کے ونڈسر کیسل میں چراغاں بھی کیا جائے گا۔
3 جون کو لندن کے ایک چرچ میں تھینکس گیونگ سروس ہوگی، 4 جون کو بکنگھم پیلس میں موسیقی کی تقریب کا انعقاد ہوگا اور 5 جون کو ملک بھر میں تقریبات ہوں گی۔
خیال رہے کہ ملکہ الزبتھ دوم اپنے والد کے فروری 1952 میں انتقال کے بعد ملکہ بن گئی تھیں مگر ان کی باضابطہ تاج پوشی 2 جون 1952 کو ہوئی۔
