لاہور: (ویب ڈیسک) پیپلزپارٹی کی مرکزی نائب صدرسینیٹر شیری رحمان نے کہا ہے کہ جمہوریت اور پاکستان کو مزید غیر مستحکم کرنے سے پہلے وزیراعظم کو گھر جانا چاہیے، اناپرست عمران خان کے لیے اب کوئی راستہ نہیں بچا ہے۔
شیری رحمان نے اپنے بیان میں کہا کہ عمران خان نے اپنا مینڈیٹ کھو دیا ہے، وزیراعظم ہر گزرتے دن کے ساتھ پارلیمنٹ میں اپنی تعداد کے ساتھ ساتھ حمایت بھی کھو رہے ہیں، کوئی عمران خان کو سمجھائے کہ حکومت پوری زندگی کے لیے نہیں ہوتی، یہ بادشاہت نہیں ہے۔
شیری رحمان نے کہا کہ وزیراعظم پارلیمنٹ کی لڑائی کو سڑکوں پر لے جانے پر تلا ہوا ہے، اپنی حکومت کو بچانے کے لیے آئین کو پامال کرنا ان کی ذہنی حالت کی عکاسی کرتا ہے، سیاسی شکست پی ٹی آئی کا انجام بن چکا ہے، ان کے ساتھ نہ مانگے تانگے کے ارکان ہیں نہ ہی اتحادی، شیری رحمان نے کہاکہ سپیکر کو چاہیے وہ وزیراعظم کو بچانے کی کوششیں بند کریں، تاخیری حربے اب وزیراعظم کو نہیں بچا پائیں گے۔
