میکسیکو : (ویب ڈیسک) میکسیکو میں فٹبال میچ کے دوران شائقین میں تصادم کے نتیجے میں کم از کم 22 افراد زخمی ہو گئے۔
غیر ملکی خبررساں ادارے کے مطابق میکسیکو میں فٹبال میچ کے دوران افسوس ناک واقعہ پیش آیا جب کیوریٹرو اور اٹلس کے درمیان ہونے والے میچ میں لڑائی شروع ہو گئی۔ لڑائی شائقین کے درمیان اسٹینڈرز میں ہوئی جس کے نتیجے میں 22 افراد زخمی ہوئے۔
لڑائی کے دوران شائقین نے ایک دوسرے پر لاتوں اور گھنسوں کی بارش کی۔ لڑائی کے دوران اسٹیڈیم میں موجود وار مانیٹر کو نقصان پہنچا جبکہ زخمی ہونے والوں میں 2 افراد کی حالت انتہائی تشویش ناک بتائی گئی۔
میکسیکو لیگا ایگس ایم ایکس کے ایگزیکٹیو صدر نے واقع کی مذمت کرتے ہوئے کہا کہ اسٹیڈیم میں سیکیورٹی کے ناقص انتظامات پر ذمہ داران کو سزا دی جائے گی۔
انہوں نے کہا کہ ہمارے لیے تمام کھلاڑیوں اور شائقین کی حفاظت اولین ترجیح ہے۔
اٹلس کلب کی جانب سے جاری بیانیے میں مطالبہ کیا گیا کہ لیگ انتظامیہ اور حکام کی جانب سے اس واقعہ کی تحقیقات کی جائے تاکہ ناخوشگوار واقعہ میں ملوث افراد کا تعین کیا جا سکے اور ان کے خلاف قانوں کی پاسداری کو یقینی بنایا جائے۔
دوسری جانب کیوریٹرو کے گورنر ماروسیو کوری کا کہنا ہے کہ کلب کے مالکان اور اداروں کو حقائق کا جواب دینا چاہئیے، میں نے ہدایات جاری کردی ہیں کہ قانون پاسداری کرتے ہوئے اس واقعہ کے ذمہ داران کو سزا دی جائے۔
