وفاقی وزیر داخلہ شیخ رشید نے وزیر اطلاعات فواد چوہدری کو میڈیا سے لڑائی نہ کرنے کا مشورہ دیا ہے۔
اپنے بیان میں شیخ رشید نے کہا کہ فواد چوہدری پڑوسی بھی ہیں، ان کو ہمیشہ کہتا ہوں میڈیا سے بنا کر رکھیں، لڑائی جھگڑا نہ کریں کیونکہ آج کی سیاست میڈیا کے بغیر ممکن نہیں۔
اسلام آباد میں شیخ رشید کی کتاب “لال حویلی سے اقوام متحدہ تک “ کی تقریب رونمائی ہوئی۔
تقریب میں وفاقی وزیر اعجاز شاہ، فواد چوہدری، غیر ملکی سفیر اور دیگرشخصیات شریک ہوئیں۔ چینی سفیر بھی وزیر داخلہ شیخ رشید کی کتاب کی تقریب رونمائی میں موجود تھے۔
شیخ رشید نے تقریب سے خطاب میں کہا کہ لال حویلی کے باہر بچپن میں کتابیں بیچتا تھا ، ہماری حکومت کے دو تین کام تاریخی ہیں لیکن مناسب طریقے سے پیش نہیں کرسکے ، معیشت کورونا کے باعث شدید بحران کا شکار تھی جسے سنبھالا۔
انہوں نے کہا کہ یہ ملک الیکشن کی طرف جارہا ہے، عنقریب پنجاب میں بلدیاتی انتخابات ہورہے ہیں۔
شیخ رشید نے اعتراف کیا کہ حقیقت ہے کہ ہم انہیں عدالتوں سے سزا نہیں دلواسکے جو دیدہ دانستہ بدعنوان تھے۔
وزیر داخلہ شیخ رشید نے کہا کہ اگر اپوزیشن نے غلطی کی تو ملکی سیاست مشکل کا شکار ہو سکتی ہے۔
تقریب سے خطاب میں شیخ رشید نے وصیت کی کہ میری چوتھی کتاب میرے مرنے کے 5 سال بعد شائع کی جائے۔
اس موقع پر وفاقی وزیر اسد عمر نے اپنے خطاب میں کہا کہ شیخ رشید ہماری سیاست میں ایک منفرد شخصیت ہیں، شیخ صاحب کے تجربے سے ہمیں کابینہ میں بہت فائدہ ہوتا ہے۔
تقریب سے خطاب میں فواد چوہدری نے کہا کہ شیخ رشید کو پہلی بار جیل میرے تایا نے پہنچایا تھا ، شیخ صاحب میرے تایا چوہدری شہباز کے دوست بن گئے۔
اس پر شیخ رشید نے کہا کہ نہیں میں پہلے بھی جیل جا چکا تھا مجھے سنگین سزا انہوں نے دی تھی۔
شیخ رشید نے کہا کہ فواد زبردست آدمی ہیں ان سے یہ کہتا ہوں کہ میڈیا سے لڑنا نہیں چاہیے، یقین دلاتاہوں عمران خان کیساتھ آئے ہیں اور عمران خان کے ساتھ جائیں گے۔
