صدر رجب طیب اردوان نے اس عزم کا اعادہ کیا ہے کہ ترکی افغانستان سے کبھی پیٹھ نہیں پھیرے گا۔
صدر اردوان کا کہنا ہے کہ دیرپا امن کا حصول ہماری مشترکہ خواہش ہے۔ انہوں نے یہ بات اسلامی تعاون رکن ممالک تنظیم (آئی ایس آئی پی اے بی) کی پارلیمانی یونین کے اجلاس میں کہی۔
افغانستان میں طالبان حکومت کے قیام کے بعد ترک حکام کی جانب سے انسانی بحران کی صورتحال کے بارے میں تنبیہہ پر ترکی اور اس کے امدادی ادارے افغان عوام کیلیے بڑی مقدار میں امدادی اشیا روانہ کرچکے ہیں۔
شام کے بحران کے حوالے سے صدر اردوان نے اقوام متحدہ کی سلامتی کونسل کو موردِ الزام ٹہراتے ہوئے کہا کہ سلامتی کونسل اپنی ذمے داریاں ادا کرنے میں ناکام ہے جو بہت مایوس کن ہے۔ ان کا کہنا تھا کہ جنگِ عظیم دوم کے دوران یورپ میں ہوئی یہودی نسل کشی کا انتقام فلسطینیوں سے لینا غیرمنصفانہ اور غیر اخلاقی ہے۔
صدر رجب طیب اردوان نے کہا کہ ہم شام سے یمن اور افغانستان سے رخائن تک تمام بحران زدہ علاقوں میں انسانیت اور انسانی وقار کو بچانے والے کام کر رہے ہیں۔ ترکی جنگوں، جھڑپوں اور دہشت گردی سے جان بچا کر بھاگنے والے 50 لاکھ مہاجرین کو بھی پناہ دیے ہوئے ہے۔
صدر رجب طیب اردوان نے مزید کہا کہ کورونا وبا کے خلاف جدوجہد کے دوران ترکی نے کھُلے دل سے 160 ممالک اور 12 عالمی اداروں کی مدد کی جبکہ 11 ممالک کو ویکسین بھی فراہم کی۔
صدر رجب طیب اردوان نے اسلامی تعاون رکن ممالک تنظیم (آئی ایس آئی پی اے بی) کے ارکان پر زور دیا کہ وہ دنیا بھر میں جاری اسلامو فوبیا کی لہر اور نفرت انگیز تقاریر کے خلاف فیصلہ کن اقدامات اٹھائیں۔
