سندھ حکومت کے ترجمان مرتضیٰ وہاب کا کہنا ہے کہ جنوبی پاکستان میں اب تک کورونا وائرس شمالی پاکستان کی طرح نہیں پھیلا ہے اس لیے وفاقی حکومت سے گزارش کی ہے کہ بین الصوبائی ٹرانسپورٹ بند کی جائے۔
کراچی میں میڈیا سے بات کرتے ہوئے ان کا کہنا تھا کہ وزیر اعظم سے گزارش کی ہے کہ بہت سے لوگ 50 سال سے کم عمر کے ہیں تاہم دیگر بیماریوں میں مبتلا ہیں وہ اس سے مستفید نہیں ہوسکتے اس لیے اس عمر کے بریکٹ کو ختم کیا جائے۔
ترجمان نے یہ بھی کہا کہ اس کے علاوہ معیاری آپریٹنگ طریقہ کار پر عمل درآمد کرانے والے اور قانون نافذ کرنے والے اداروں کو بھی ویکسین فراہم کی جانی چاہیے۔
انہوں نے کہا کہ سندھ حکومت نے لاک ڈاؤن کی تجویز نہیں دی ہم نے صرف بین الصوبائی ٹرانسپورٹ بند کرنے کی بات کی ہے۔
مرتضیٰ وہاب کا کہنا تھا کہ سندھ حکومت اپنے اخراجات پر ویکسین درآمد کرنے کو تیار ہیں، سائنوفام چین کی سرکاری کمپنی ہے اس لیے یہ انفرادی سطح پر ڈیل نہیں کرتی۔
ان کا کہنا تھا کہ سندھ حکومت اپنی عوام کو تحفظ فراہم کرنے کی کوشش کر رہی ہے اور آج کینسینو کمپنی کو 20 لاکھ ویکسین کا آرڈر دے دے گی۔
کورونا ٹاسک فورس کا اجلاس
قبل ازیں وزیراعلیٰ سندھ سید مراد علی شاہ کی صدارت میں کورونا ٹاسک فورس کا اجلاس ہوا۔
اجلاس میں صوبائی وزیر صحت، وزیر لیبر، وزیر بلدیات، مشیر قانون، پارلیمانی سیکریٹری برائے صحت، چیف سیکریٹری، آئی جی پولیس، ایڈیشنل چیف سیکریٹری، ڈبلیو ایچ او، آغا خان اور انڈس ہسپتال کے نمائندوں نے شرکت کی۔
وزیر اعلیٰ سندھ کے ترجمان کی جانب سے جاری بیان کے مطابق اجلاس میں وزیر اعلیٰ سندھ کو بریفنگ دی گئی کہ سندھ میں اب تک مجموعی طور پر 33 لاکھ ٹیسٹ ہوچکے ہیں۔
ان کو بتایا گیا کہ صوبے میں 664 آئی سی یو بیڈز یا وینٹیلیٹر اور 1872 ایچ ڈی یو بیڈز اور 1374 لو فلو آکسیجن بیڈز کا انتظام ہے۔
اجلاس کو بتایا گیا کہ گزشتہ روز 8 ہزار 913 ٹیسٹ کیے گئے جن میں 237 کیسز، 2.7 فیصد سامنے آئے اور اس وقت تک صوبے میں مجموعی 2 لاکھ 65 ہزار 916 کیسز ہوچکے ہیں، جن میں 2 لاکھ 56 ہزار 384 صحتیاب بھی ہوچکے ہیں۔
اس کے علاوہ سندھ میں اب تک مجموعی 4 ہزار 504 افراد کی وائرس سے اموات ہوچکی ہیں جو مجموعی کیسز کا 1.7 فیصد ہے۔
اجلاس میں صوبے میں برطانیہ سے آنے والوں کا ایک ماہ کا ڈیٹا جمع کرنے کا فیصلہ کیا گیا۔
اس موقع پر وزیراعلیٰ سندھ نے کہا کہ وہ لاک ڈاؤن نہیں چاہتے۔
ان کا کہنا تھا کہ ‘ہم صرف بین الصوبائی ٹرانسپورٹ کو 2 ہفتوں کے لیے بند کرنا چاہتے ہیں، بین الصوبائی ٹرانسپورٹ بند ہونے سے تیسری لہر کا مزید پھلاؤ رک سکتا ہے’۔
انہوں نے مزید کہا کہ ‘ہم اکیلے بین الصوبائی ٹرانسپورٹ بند نہیں کر سکتے یہ قومی فیصلہ ہونا چاہیے’۔
