رواں سال معمول سے زیادہ ہوئی بارشوں کے باعث پنجاب کے دریاؤں میں پانی کی بڑھتی سطح کو کنٹرول کرنےکے لیے منگلا ڈیم کا کردار اہم ہے۔
واپڈا کی جانب سے جاری کیے گئے اعلامیے میں پنجاب کو سیلاب کی تباہ کاریوں سے بچانے میں منگلا ڈیم کے کردار کو نہایت اہم قرار دیا گیا ہے۔
واپڈا کا کہنا ہے کہ اگست اور ستمبر میں ہوئی طوفانی بارشوں سے دریائے جہلم اور چناب میں شدید سیلابی کیفیت پیدا ہوئی جس کے بعد منگلا ڈیم نے دریائے جہلم میں اچانک آنے والے بڑے سیلابی ریلوں کو ذخیرہ کیا۔
واپڈا کے مطابق 28 اگست کو دریائے جہلم میں منگلا کے مقام پر 4 لاکھ15 ہزار کیوسک کا سیلابی ریلا داخل ہوا جب کہ اسی روز دریائے چناب میں مرالہ کے مقام سے 3 لاکھ کیوسک کا ریلا گزررہا تھا۔
اعلامیے میں کہا گیا ہے کہ منگلا ڈیم نے دریائے جہلم میں 4 لاکھ 15 ہزار کیوسک کے سیلابی ریلے کو روکتے ہوئے دریائے جہلم کے زیریں جانب صرف 1 لاکھ کیوسک پانی خارج کیا جس کے باعث منگلا کے مقام پر سیلاب کی شدت میں واضح کمی دیکھنے میں آئی۔
واپڈا کا کہنا ہے کہ اس دوران جہلم اور تریموں کے نواحی علاقے سیلاب کی تباہ کاریوں سے محفوظ رہے۔ تاہم اگر منگلا میں سیلابی ریلا نہ روکا جاتا تو دونوں دریاؤں کے سنگم تریموں پر بڑا سیلاب آتا۔
