ملتان (ویب ڈیسک) چیف ایگزیکٹو آفیسر میپکو انجینئر طاہر محمودنے جنوبی پنجاب میں ممکنہ بارشوں اور آندھیوں کے پیش نظر افسران وسٹاف کو الرٹ رہنے کی ہدایت کردی ہے ۔ انہوں نے ریجن کے تمام سپریٹنڈنگ انجینئرز کو جاری ہدایات میں کہا ہے کہ محکمہ موسمیات کی جانب سے جون کے پہلے ہفتے میں آندھیوں اور شدید بارشوں کی پیشگوئی کے پیش نظر بجلی سسٹم پر گہری نگاہ رکھی جائے۔بجلی بند ہونے کی صورت میں بحالی کے لئے ہنگامی بنیادوں پر اقدامات کئے جائیں اور سب ڈویژنوں میں ایمرجنسی ٹرانسفارمرزٹرالیاں تیار رکھی جائیں ۔ ٹرانسفارمرز خراب ہونے کی صورت میں فوری طورپر ٹرالی نصب کرکے کم سے کم وقت میں بجلی کی بحالی یقینی بنائی جائے۔ لائن سٹاف مکمل ٹی اینڈ پی اور سیفٹی پالیسی کے تحت بجلی بحالی کے لئے کام کریں ۔
فالٹ بھی کم سے کم وقت میں تلاش کرکے صارفین کی مشکلات دور کی جائیں ۔ چیف ایگزیکٹو آفیسر نے صارفین سے اپیل کی ہے کہ وہ بھی بارشوں کے دوران بجلی تنصیبات سے دور رہیں ۔ بجلی بند ہونے کی صورت میں اپنے بلوں پر درج متعلقہ شکایت مرکز اور سب ڈویژن کے لینڈ لائن نمبر پر رابطہ کریں ۔بارش کے دوران بجلی کے کھمبوں اورتاروں سے دوررہیں اور اپنے جانوروں کو بھی بجلی کے کھمبوں سے مت باندھیں ۔ صارفین، عام شہریوں اور میپکو سٹاف کی قیمتی جانوں کا تحفظ ہمارا فرض ہے ۔
