کراچی (ویب ڈیسک)کراچی کے علاقے گلشن اقبال میں نامعلوم مسلح افراد نے فائرنگ کر کے ڈاکٹر کو قتل کردیا۔پولیس کے مطابق موٹرسائیکل پر سوار دو مسلح افراد نے 58 سالہ ڈاکٹر حیدر عسکری کو کے ڈی اے مارکیٹ، بلاک 3 نزد ڈسکو بیکری کے پاس نشانہ بنایا۔اس ضمن میں بتایا گیا کہ ڈاکٹر حیدر عسکری اپنی کار میں سوار تھے جب مسلح افراد نے فائرنگ کی۔ایس پی گلشن شاہنواز چاچڑ نے بتایا کہ واقعہ 12 بج 30 منٹ پر پیش آیا جب امراض قلب کے ماہر ڈاکٹر حیدرعسکری کورنگی میں سرکاری ہسپتال سے ڈیوٹی کے اوقات مکمل کرنے کے بعد گلشن اقبال میں اپنی رہائش گاہ کی طرف جارہے تھے۔پولیس کے مطابق ان کے بائیں کندھے پر گولی لگی تاہم انہیں فوراً آغا خان ہسپتال منتقل کردیا گیا جہاں وہ نبرد آزما نہ ہوسکے۔بعدازاں مقتول کی لاش کو قانونی کارروائی پوری کرنے کے لیے جے پی ایم سی منتقل کردی گئی۔ایس پی گلشن نے کہا کہ تحقیقاتی ٹیم ممکنہ طور پر دو پہلوﺅں ’فرقہ وارانہ اورڈکیتی کی کوشش‘ پر غور کررہی ہے۔انہوں نے بتایا کہ ڈاکٹر حیدر عسکری اہل تشیع کمیونٹی سے تعلق رکھتے تھے اور محرم الحرم کا مہینے بھی قریب ہے، اس لیے فرقہ وارانہ پہلو کو قطعی نظر انداز نہیں کیا جاسکتا۔ایس پی گلشن نے واضح کیا کہ ’قتل کے پس منظر میں ڈکیتی کی کوشش بھی ہوسکتی ہے‘۔ایس پی شاہنواز چاچڑ نے عینی شاہدین کا حوالہ دیتے ہوئے بتایا کہ موٹرسائیکل مسلح افراد نے ڈاکٹر حیدر عسکری کو کار روکنے کی ہدایت کی تھی لیکن مقتول نے کار کی رفتار بڑھادی جس کے بعد مسلح افراد نے صرف ایک گولی چلائی جو ان کے کندھے پر لگی۔ان کا کہنا تھا کہ ’پولیس نے 30 بور پستول کی گولی کا ایک خول تحویل میں لے لیا‘۔واضح رہے کہ شہر میں ڈاکٹر کی ہلاکت کا رواں ہفتے دوسرا واقعہ ہے۔اس سے قبل گلستان جوہر کے علاقے میں چار مسلح افراد نے ڈکیتی کے دوران مزاحمت کرنے پر ڈاکٹرعائشہ پر فائرنگ کردی تھی جس پر ان کی موت واقع ہوئی تھی۔ڈاکٹرعائشہ بیرون ملک سے شادی کی تقریب میں شرکت کے لیے آئیں تھیں۔
مجلس وحدت المسلمین کی مذمت
دوسری جانب مجلس وحدت المسلمین (ایم ڈبلیو ایم) نے واقعہ کی مذمت کی اور ایسے ’ٹارگیٹ کلنگ‘ قرار دیا۔علامہ باقر زیدی نے کہا کہ ’محرم الحرم سے قبل اہل تشیع کمیونٹی کے رکن کا فرقہ وارانہ قتل قابل افسوس واقعہ ہے‘۔انہوں نے خدشے کا اظہار کیا کہ ’اس نوعت کے واقعہ سے مزید واقعات جنم لے سکتے ہیں‘۔ایم ڈبلیو ایم نے وفاقی اور صوبائی حکومت پر زور دیا کہ وہ واقعہ کا نوٹس لیں اور قاتلوں کی فوری گرفتاری عمل میں لائی جائے۔
