لاہور(نیوزایجنسیاں )پاکستان کرکٹ ٹیم کے سابق مایہ ناز لیگ سپنر مشتاق احمد نے قومی ٹیم کے کپتان سرفراز احمد کو مشورہ دیا ہے کہ اگر وہ ورلڈکپ میں کچھ بڑا کرنا چاہتے ہیں تو انہیں حالات کے مطابق ٹیم کمبی نیشن بنانا ہو گا۔تفصیلات کے مطابق مشتاق احمد کا کہنا ہے کہ ورلڈکپ جیسے بڑے ایونٹس میں کچھ ٹیم کمبی نیشن بہت اہمیت کا حامل ہوتا ہے۔ سرفراز احمد اور ٹیم مینجمنٹ کو چاہئے کہ وہ ورلڈکپ سے پہلے ممکنہ طور پر بہترین ٹیم کمبی نیشن تیار کریں۔ 1992کا ورلڈکپ جیتنے والی ٹیم کے رکن مشتاق احمد نے کہا کہ انگلینڈ کی کنڈیشنز مشکل ہوتی ہیں لیکن اس سے پہلے نمبرون ٹیم انگلینڈ کیخلاف پانچ ایک روزہ میچوں پر مشتمل سیریز قومی ٹیم کیلئے انتہائی اہمیت کی حامل اور فائدہ مند ثابت ہو گی۔انہوں نے کہا کہ اب یہ ٹیم انتظامیہ پر منحصر ہے کہ وہ انگلینڈ کیخلاف سیریز کیسے کھیلتے ہیں اور اس سیریز پر مکمل توجہ دینا ہو گی کیونکہ یہ سیریز کھلاڑیوں کے ٹمپرامنٹ کا صحیح امتحان ہو گا جبکہ اس دوران کھلاڑیوں کو آزمائش میں ڈال کر بہترین کمبی نیشن بنانے کا بہترین موقع بھی میسر ہے۔
