لاہور (نیااخبار رپورٹ) زمین پھٹی نہ آسمان گرا‘ غریب کم سن ملازمہ دو سال تک مالک مکان کی ہوس کا نشانہ بنتی رہی۔ ایک اور زینب انصاف کے ٹھیکیداروں سے چیخ چیخ کر انصاف مانگنے لگی۔ تفصیلات کے مطابق 13 سالہ کومل ولد محمد اظہر پچھلے دو سال سے جوہر ٹاﺅن آر بلاک کوٹھی نمبر 299 میں کام کرتی تھی‘ مالک مکان جنسی بلا ملزم ساجد حسین دو سال تک زیادتی کا نشانہ بناتا رہا۔ تنگ آکر کومل جس کی ماں فوت ہوچکی ہے‘ نے باپ کو سب کچھ بتا دیا۔ باپ کے پوچھنے پر عیار دولت مند ملزم ساجد اور اس کے ہمسائے پولیس اہلکار علی نے کومل اور اظہر کو تشدد اور تیزاب سے جسم جلا کر چار موبائل چوری کرنے کے اعتراف کی ویڈیو بنا کر ایف آئی آر درج کروا دی۔ لاہور ہائیکورٹ نے باپ بیٹی کو باعزت بری کردیا۔ غم زدہ باپ بیٹی کی زیادتی کی ایف آئی آر درج کرانے جاتا ہے تو جوہر ٹاﺅن چوکی والے دھکے مار کر نکال دیتے ہیں۔ ملزم ساجد جان سے مارنے کی دھمکیاں دے رہا ہے اور کہتا ہے کہ مقدموں پر جتنے پیسے لگے ہیں اس کے بدلے کومل کو زبردستی اپنے پاس رکھوں گا اور تمہارا موٹرسائیکل بھی نہیں دوں گا۔ باپ نے سی پی او کو درخواست دی‘ ان کے احکامات کے باوجود تھانیدار کے کانوں پر جوں تک نہ رینگی۔ ملزم کا ہمسایہ پولیس اہلکار علی سب سے زیادہ غنڈہ گردی کا مظاہرہ کررہا ہے۔ اپنی بیٹی کی عزت تار ہونے پر نصیبوں مارا سسکیاں لے لے کر نیااخبار دفتر کے باہر روتا رہا۔ اس کا کہنا تھا کہ کئی ہسپتال زیادتی کی تصدیق کرچکے ہیں۔ میاں محمد منشی میں ہونے والی زیادتی کی رپورٹ کئی ماہ گزرنے کے باوجود پولیس وصول کرنے نہیں جارہی۔ ملزم پولیس والوں کا منہ پیسے سے بند کررہا ہے۔ کوئی ادارہ مظلومہ کو انصاف دینے کا آسرا نہیں دے رہا۔ باپ بیٹی نے وزیراعظم پنجاب‘ آئی جی پنجاب‘ چیف جسٹس لاہور ہائیکورٹ اور ضیاشاہد سے اپیل کی کہ اس کو انصاف دلائیں اور ملزم کو قرار واقعی سزا دی جائے تاکہ کسی اور کی بیٹی کی عزت نہ لٹے۔ انہوں نے کہا کہ ہمیں انصاف نہ ملا تو گورنر ہاﺅس کے سامنے آگ چھڑک کر خود کو جلا لیںگے۔اس سلسلے میں جب ملزم ساجد حسین سے رابطہ کیا گیا تو اس نے اسے بے بنیاد اور گھٹیا الزام قرار دیا اور کہا کہ کومل اور اسکا باپ بلاوجہ مجھ پر کیچڑ اچھال رہا ہے میں بے گناہ ہوں میرے پاس سارے ثبوت موجود ہیں۔
