مصر میں معروف اداکارہ اور ماڈل کے خلاف نازیبا لباس پہننے پر مقدمہ

قاہرہ(ویب ڈیسک) مصر کی معروف شوبز اسٹار راعنیہ یوسف کے خلاف نازیبا لباس پہننے پر مقدمہ درج کرلیا گیا ہے۔بین الاقوامی خبر رساں ادارے کے مطابق مصر کی مشہور اور معروف اداکارہ راعنیہ یوسف نے انٹرنیشنل فلم فیسٹیول کے آخری سیشن میں ایسا لباس پہنا تھا جس سے اس کا جسم جھلک رہا تھا۔ ناقدین نے لباس کو سوئمنگ سوٹ سے مشابہت دیتے ہوئے اداکارہ کے خلاف مقدمہ درج کرادیا۔اداکارہ کے خلاف مقدمہ درج کرانے والے دونوں افراد پیشے کے لحاظ سے وکیل ہیں، اپنی درخواست میں ان وکلاءکا کہنا تھا کہ راعنیہ یوسف باریک اور پتلا لباس پہن کر جسم کو عیاں کرنے اور جنسی اشتعال انگیزی کی مرتکب ہوئی ہیں جو کہ مصر کے قانون میں قابل گرفت جرم ہے۔وکلاءکی درخواست پر اداکارہ راعنیہ کے خلاف جنسی اشتعال انگیزی اور مصر کی روایات کو توڑنے کی دفعات کے تحت مقدمہ درج کر کے سماعت کے لیے 12 جنوری کو طلب کرلیا گیا ہے۔ مصر میں جنسی اشتعال انگیزی کی سزا پانچ سال قید ہے۔44 سالہ اداکارہ راعنیہ یوسف کے خلاف جنسی اشتعال انگیزی کا مقدمہ درج کروانے والے وکلائ عمرو عبدالسلام اور سمیر صابری شوبز ستاروں کے خلاف مقدمات درج کرانے کے لیے شہرت رکھتے ہیں اور اس سے قبل بھی کئی اداکاراو?ں کے خلاف مقدمہ درج کرا چکے ہیں۔