کیویز کو قابو کرنے کیلئے حکمت عملی تیار:سرفراز

ابوظہبی(آئی این پی) پاکستان ٹیم کے قائد سرفراز احمد نے کہا ہے کہ نیوزی لینڈکیخلاف تیسرے اورآخری ٹیسٹ میں محمد عباس کی کمی ضرور محسوس ہوگئی لیکن انکی غیر موجودگی سے ٹیم کی کارکردگی پر کوئی اثر نہیں پڑے گا۔ حریف ٹیم کو قابوکرنے کےلئے ہم نے اپنی حکمت عملی تیارکرلی ہے۔دوسرے میچ میں جیت کے بعد پلیئرزکامورال بلندہے ۔کھلاڑی جیت کاعزم لے کر میدان میں اتریں گے۔آخری میچ میں غلطی کی گنجائش نہیںورنہ سیریزہاتھ سے نکل سکتی ہے۔ امید ہے یاسرشاہ عمدہ کارکردگی کے تسلسل کو برقرار رکھتے ہوئے ٹیم کو فتوحات دلانے میں کردار ادا کریں گے۔ دوسری جانب کیویزکپتان کین ولیمسن نے کہا ہے کہ بلے بازوں کی کارکردگی تسلی بخش ہے تاہم ابھی مزید بہتری کی ضرورت ہے، یاسر شاہ غیرمعمولی باﺅلر ہیں، ان کا سامنا کرنا چیلنجنگ ہوتا ہے۔ آخری میچ میں تیاری کیساتھ میدان میں اتریں گے۔امیدہے اچھا مقابلہ ہوگا۔پاکستان اور نیوزی لینڈ کی کرکٹ ٹیموں کے درمیان تین ٹیسٹ میچوں کی سیریز کا آخری اور فیصلہ کن میچ 3دسمبر سے ابوظہبی میں شروع ہوگا۔ دونوں ٹیموں کے درمیان سیریز 1-1سے برابر ہے۔ کیویز نے پہلے میچ میں پاکستان کو 4رنز سے شکست دی تھی جبکہ دوسرے میچ میں پاکستان نے شاندار کم بیک کرتے ہوئے کیویز کو ایک اننگز اور 16رنز سے شکست دیکر سیریز 1-1 سے برابر کردی تھی۔دونوں ٹیموں کے درمیان سیریز کا تیسرا میچ فائنل کی حیثیت اختیار کر گیا ہے اور جو ٹیم یہ میچ جیتے گی وہ سیریز اپنے نام کرنے کی حقدار ہوگی۔ پاکستان ٹیم کے لئے بری خبر یہ ہے کہ فاسٹ باﺅلر محمد عباس دائیں کندھے میں انجری کے باعث کیویز کے خلاف سیریز کے تیسرے اور آخری ٹیسٹ میچ سے باہر ہوگئے ہیں۔ واضح رہے کہ پاکستان نے نیوزی لینڈ کے خلاف شیڈول آخری اور فیصلہ کن ٹیسٹ میچ کیلئے ٹیم میں کوئی تبدیلی نہ کرنے کا فیصلہ کیا تھا تاہم محمد عباس کے ان فٹ ہونے کی وجہ سے ٹیم میں ایک دو تبدیلیاں کرنے پریں تاہم اس کا فیصلہ میچ سے قبل ہوگا۔یاسر شاہ نے کیویز کے خلاف دوسرے ٹیسٹ میچ میں غیرمعمولی باﺅلنگ کا مظاہرہ کرتے ہوئے 14 وکٹیں لیکر ٹیم کو فتح دلائی تھی۔دونوں ٹیموں کے درمیان فیصلہ کن ٹیسٹ 3 دسمبر سے ابوظہبی میں شروع ہو گا۔ پاکستانی سکواڈ کپتان سرفراز احمد، امام الحق، اظہر علی، اسد شفیق، حارث سہیل، بابر اعظم، سعد علی، محمد حفیظ، یاسر شاہ، بلال آصف، محمد عباس، حسن علی، فہیم اشرف، شاہین شاہ آفریدی اور میر حمزہ پر مشتمل ہے۔ حتمی ٹیم کو فیصلہ میچ سے قبل کیا جائیگا۔