دبئی(ویب ڈیسک) پاکستان کے خلاف ون ڈے سیریز سے قبل کیویز کو انجریز نے گھیر لیا ہے۔ذرائع کے مطابق ایڑی کی تکلیف کا شکار کورے اینڈرسن وطن واپس روانہ ہوگئے ہیں جب کہ ٹوڈ ایسٹل بھی گھٹنے میں درد کے باعث پاکستان کے خلاف پہلے ون ڈے میچ میں شرکت نہیں کر پائیں گے، ایسٹل کے کور کے طور پر اعجاز پٹیل کو یو اے ای میں ہی روک لیا گیا ہے، کیوی اسپنر نے ٹی ٹوئنٹی سیریز میں ڈیبیو کیا تھا، مختصر فارمیٹ کے میچز کے لئے منتخب چارج ورکر اور لوکی فرگوسن کو بھی ون ڈے سکواڈ میں شامل کر لیا گیا ہے۔دوسری جانب ٹی ٹوئنٹی سیریز کے لیے منتخب نہ ہونے والے ٹرینٹ بولٹ اور میٹ ہینری یو اے ای پہنچ چکے ہیں اور ایک روزہ میچز کے لئے مہمان اسکواڈ کا حصہ ہوں گے۔ جارج ورکر نے 2015 میں ون ڈے ڈیبیو کیا تھا اور ابھی تک صرف 7 میچ ہی کھیل پائے ہیں، مارٹن گپٹل اور کورے اینڈرسن کی انجریز نے انہیں صلاحیتوں کے اظہار کا موقع فراہم کر دیا ہے۔
