چٹاگانگ (اے پی پی) ایشین کرکٹ کونسل انڈر 19 ایشیا کپ میں پاکستان نے ہانگ کانگ کو یکطرفہ مقابلے کے بعد 9 وکٹوں سے شکست دے کر فاتحانہ آغاز کیا، گرین شرٹس نے 78 رنز کا آسان ہدف 15ویں اوور میں محض 1 وکٹ کے نقصان پر پورا کیا، نسیم شاہ نے 4 اور جنید خان نے 3 وکٹیں لیں، نسیم شاہ میچ کے بہترین کھلاڑی قرار پائے۔ ہفتہ کو بنگلہ دیش میں شروع ہونے والے انڈر 19 ایشیا کپ کے ابتدائی روز گروپ بی کے میچ میں ہانگ کانگ کی ٹیم پہلے کھیلتے ہوئے 33 اوورز میں 77 رنز پر ڈھیر ہو گئی، گرین شرٹس کے باﺅلرز کی نپی تلی باﺅلنگ کے سامنے ہانگ کانگ کی بیٹنگ لائن اپ ریت کی دیوار ثابت ہوئی، 10 کھلاڑی دورا ہندسہ عبور کرنے میں ناکام رہے، ہارون ارشد 36 رنز بنا کر نمایاں رہے، نسیم شاہ نے 5 جنید خان نے 3، فرخ عباس اور محمد آصف نے ایک، ایک وکٹ لی، جواب میں پاکستانی انڈر 19 ٹیم نے مطلوبہ ہدف 14.4 اوورز میں ایک وکٹ پر حاصل کیا، محمد محسن خان 32 اور کپتان روحیل نذیر 24 رنز بنا کر ناقابل شکست رہے۔گروپ بی کے ایک اورمیچ میں سری لنکانے بنگلہ دیش کیخلاف6وکٹوں سے کامیابی سمیٹی،گروپ اے میں بھارت نے نیپال کو171رنزسے ٹھکانے لگایا۔افغانستان نے یواے ای کو5وکٹوں سے ہرایا۔
