لاہور (ویب ڈیسک )پاکستان کی رواں سال عید پر ریلیز ہونے والی فلم ’جوانی پھر نہیں آنی 2‘ نے صرف پاکستانی عوام کو ہی متاثر نہیں کیا بلکہ صدر مملکت عارف علوی بھی اس فلم کے مداح ہوگئے۔صدر پاکستان 69 سالہ ڈاکٹر عارف علوی نے گزشتہ رات ایک ٹوئیٹ کرکے عوام کو بتایا کہ انہوں نے ایک فلم دیکھی۔یہ فلم کوئی اور نہیں بلکہ رواں سال کی فلم ’جوانی پھر نہیں آنی 2‘ تھی۔انہوں نے اپنی ٹوئیٹ میں فلم کی تعریف کی، جبکہ پاکستانی سینما کے تیزی سے آگے بڑھنے اور اچھی فلمیں بنانے کو بھی سراہا۔صدر مملکت کی جانب سے ایسی ٹوئیٹ کیے جانے کے بعد عوام عارف علوی کی اس ٹوئیٹ پر کافی دلچسپی دکھا رہے ہیں۔ان کی ٹوئیٹ پر ٹی وی میزبان اقرارالحسن نے بھی کمنٹ کرتے ہوئے لکھا کہ انہیں صدر پاکستان کی جانب سے کی گئی ایسی ٹوئیٹ پڑھ کر خوشی ہوئی۔فلم ’جوانی پھر نہیں آنی 2‘ 2015 میں ریلیز ہونے والی فلم ’جوانی پھر نہیں آنی‘ کا سیکوئل ہے۔اس فلم میں ہمایوں سعید، فہد مصطفیٰ، واسع چوہدری، احمد علی بٹ، کبریٰ خان، ماورا حسین، عظمیٰ خان اور ثروت گیلانی نے اہم کردار ادا کیے۔
