پرتھ(آئی این پی)انگلش ٹیم پرتھ ٹیسٹ کے دوسرے روز اپنی پہلی اننگز میں403رنز بناکر آﺅٹ ہوگئی۔ ڈیوڈ میلان اور جونی بیئرسٹو نے شاندار سنچریاں سکور کیں۔ مچل سٹارک نے4کھلاڑیوں کو آﺅٹ کیا۔ آسٹریلیا نے دوسرے روز کھیل کے اختتام پر3وکٹوں کے نقصان پر 203رنز بنا لئے اور اسے انگلینڈ کی اننگز کا سکور برابر کرنے کیلئے مزید200رنز درکار ہیں۔سٹیون سمتھ 92 رنز کے ساتھ وکٹ پر موجود ہیں۔ کریگ اورٹن نے دو وکٹیں حاصل کیں۔ تفصیلات کے مطابق جمعہ کو پرتھ میں ٹیسٹ کے دوسرے روز انگلینڈ نے اپنی پہلی نامکمل اننگز 305 رنز 4 کھلاڑی آﺅٹ پر دوبارہ شروع کی ڈیوڈ میلان 110 اور جونی بیئرسٹو 75 رنز پر ناٹ آﺅٹ تھے، دونوں بلے بازوں کے مابین 237 رنز کی ریکارڈ شراکت قائم ہوئی۔ ڈیوڈ میلان نے کیریئر بیسٹ اننگز کھیلی اور 140 رنز بنانے کے بعد نیتھن لائن کی گیند پر کیچ آﺅٹ ہو گئے۔پیٹ کمنز نے معین علی کو صفر پر پویلین واپس بھیج دیا۔ کرس ووکس بھی زیادہ دیر وکٹ پر نہ ٹھہر سکے اور 8 رنز بناکر جوش ہیزلووڈ کا نشانہ بن گئے۔ جونی بیئرسٹو نے چوتھی ٹیسٹ سنچری سکور کی اور 119 رنز بناکر مچل سٹارک کی گیند پر کلین بولڈ ہوگئے۔ کریگ اورٹن 2 اور سٹورٹ براڈ 12 رنز بناکر آﺅٹ ہوئے۔ اس طرح انگلینڈ کی پوری ٹیم 403 رنز بناکر آﺅٹ ہوگئی۔مچل سٹارک نے چار، جوش ہیزلووڈ نے تین اور پیٹ کمنز نے دو وکٹیں حاصل کیں۔ آسٹریلیا نے دوسرے روز کھیل کے اختتام پر 3 وکٹوں کے نقصان پر 203 رنز بنا لئے اور اسے انگلینڈ کی اننگز کا سکور برابر کرنے کیلئے مزید 200 رنز درکار ہیں۔ کپتان سٹیون سمتھ 92 اور شان مارش 7 رنز کے ساتھ وکٹ پر موجود ہیں۔ ڈیوڈ وارنر 22 ، کیمرون بنکرافٹ 25 اور عثمان خواجہ 50 رنز بناکر آﺅٹ ہوئے۔ کریگ اورٹن نے دو اور کرس ووکس نے ایک وکٹ حاصل کی۔
