لاہور: (ویب ڈیسک) سماجی رابطوں کی ویب سائٹس پر انتقال کی جھوٹی افواہ پھیلنے کے بعد معروف پاکستانی کرکٹر عمر اکمل نے اپنے زندہ ہونے کی تصدیق کرتے ہوئے پیغام جاری کر دیا۔ سماجی رابطوں کی ویب سائٹس پر کرکٹر عمر اکمل کے حوالے سے یہ خبریں گردش کر رہیں تھیں کہ حال ہی میں مظاہرین اور پولیس کے درمیان تصادم میں عمر اکمل بھی جان کی بازی ہار گئے ہیں، اور ان کی ایک تصویر بھی جاری کی گئی تھی۔ اس بات کی اطلاع جب عمر اکمل کو ملی تو انہوں نے بھی اس پر ردعمل دیتے ہوئے ایک ویڈیو پیغام سوشل میڈیا پر جاری کیا۔ کرکٹر کا کہنا تھا کہ الحمد اللہ میں ٹھیک ٹھاک اور راولپنڈی میں ہوں جب کہ سوشل میڈیا پر آنے والی تمام خبریں بے بنیاد ہیں۔
