راولپنڈی(نیوزایجنسیاں) قومی ٹی20 کپ کے فائنل میں لاہور بلیوز نے ایونٹ کی فیورٹ لاہور وائٹس کو یکطرفہ مقابلے کے بعد سات وکٹ سے شکست دےکر چمپئن بننے کا اعزاز حاصل کر لیا۔ فاتح سائیڈنے ہدف 17.3 اوورز میں 3 وکٹوں پرحاصل کیا ۔ ناقابل شکست ففٹی بنانے پر امام الحق مین آف دی میچ قرار پائے ۔ کامران اکمل 432 رنز بنانے پربہترین بلے باز ، عمید آصف 14 شکار کرنے پر بہترین باﺅلر اورحماداعظم کو بہترین آل راﺅنڈرکاایوارڈملا۔ راولپنڈی کرکٹ اسٹیڈیم میں جاری ٹورنامنٹ کے فائنل میں لاہور وائٹس کے کپتان سلمان بٹ نے ٹاس جیت کر پہلے بیٹنگ کا فیصلہ کیا جو بالکل غلط ثابت ہوا اور ان کے سوا کوئی بھی بلے باز لاہور بلوز کے باو¿لرز کا ڈٹ کر سامنا نہ کر سکا۔اوپنرز سلمان بٹ اور کامران اکمل نے ٹیم کو 34 رنز کا آغاز فراہم کیا لیکن اسکور 66 تک پہنچتے پہنچتے وائٹس کی ٹیم کامران اکمل، سمیع اسلم، عمر اکمل اور آصف ذاکر کی خدمات سے محروم ہو چکی تھی۔اس موقع پر کپتان سلمان بٹ نے شاندار بیٹنگ کا مظاہرہ کرتے ہوئے ٹیم کا مجموعہ باعزت مقام تک پہنچانے کا بیڑا اٹھایا اور عامر یامین کے ساتھ پانچویں وکٹ کیلئے 47 رنز جوڑے جس میں یامین کا حصہ 15 رنز رہا۔لاہور وائٹس کی ٹیم مقررہ اوورز میں پانچ وکٹوں کے نقصان پر 127 رنز بنا سکی، کپتان سلمان بٹ نے عمدہ بیٹنگ کرتے ہوئے ناقابل شکست 62 رنز کی اننگز کھیلی جس میں آٹھ چوکے شامل تھے جبکہ کامران اکمل 20 رنز کے ساتھ دوسرے کامیاب بلے باز رہے۔لاہور بلوز کی جانب سے عاطف جبار دو وکٹیں لے کر سب سے کامیاب باو¿لر رہے جبکہ اعزاز چیمہ، خالد عثمان اور آغا سلمان نے ایک، ایک وکٹ حاصل کی۔ہدف کے تعاقب میں بلوز کے اوپنرز امام الحق اور احمد شہزاد نے اپنی ٹیم کو 43 رنز کا اچھا آغاز فراہم کر کے جیت کی بنیاد رکھی، احمد شہزاد 22 رنز بنا کر پویلین لوٹے۔اس کے بعد امام الحق کا ساتھ نبھانے کپتان محمد حفیظ آئے اور دونوں کھلاڑیوں نے ذمے دارانہ بیٹنگ کرتے ہوئے ٹیم کی سنچری مکمل کرائی لیکن ہدف سے چند قدم کی دوری پر حفیظ کی35 گیندوں پر 33 رنز کی اننگز بلال آصف کے ہاتھوں تمام ہوئی جبکہ جلد ہی حسین طلعت بھی پویلین لوٹ گئے ۔امام الحق نے عمدہ بیٹنگ کا سلسلہ جاری رکھا اور ناقابل شکست 59 رنز کی اننگز کھیل کر اپنی ٹیم کو سات وکٹ سے فتح دلانے کے ساتھ ساتھ قومی ٹی20 کپ کا چمپئن بھی بنوا دیا۔
