لندن (شوبز ڈیسک) ایک برطانوی ٹیلی ویژن لیڈی ڈیانا سے متعلق عنقریب ایک ایسی ڈاکومنٹری نشر کرے گا جس میں آنجہانی ڈیانا اپنی ناکام شادی اور برطانوی شاہی خاندان کے ساتھ کشیدہ تعلقات کے بارے میں گفتگو کرتی دکھائی دیتی ہیں۔فلم کی تیاری میں شہزادی ڈیانا کی زندگی میں ریکارڈ کیے گئے ایسے ویڈیو کلپ استعمال کیے گئے ہیں جو اس سے قبل برطانیہ میں کبھی نشر نہیں کیے گئے۔ویڈیو میں لیڈی ڈیانا برطانوی شاہی خاندان کے ساتھ کشیدہ تعلقات اور برطانوی ولی عہد شہزادہ چارلس کے ساتھ اپنی شادی کی ناکامی کے بارے میں گفتگو کرتی نظر آتی ہیں۔1990 کی دہائی کے شروع میں ریکارڈ کی گئی اس ویڈیو میں ڈیانا آواز کی کوچنگ کرنے والے شخص سے ان امور کے بارے میں گفتگو کرتے ہوئے بتاتی ہیں کہ جب انہوں نے ملکہ الزبتھ ثانی کو اپنی ناکام ہوتی ازدواجی زندگی کے بارے میں بتایا تو ملکہ کا رد عمل کیا تھا۔ ڈیانا کہتی ہیں کہ ملکہ نے جوابا کہا، مجھے نہیں معلوم کہ تمہیں کیا کرنا چاہیے۔لیڈی ڈیانا اس ویڈیو میں یہ بتاتی بھی دکھائی دیتی ہیں کہ کیسے وہ اپنی سیکورٹی پر مامور ایک شخص بیری ماناکی کے عشق میں مبتلا ہوئیں۔جرمن ادارے ڈوئچے ویلے کے مطابق 2004 میں لیڈی ڈیانا کی زندگی میں ریکارڈ کی گئی اس ویڈیو کے کچھ حصے ایک امریکی نشریاتی ادارے نے نشر کیے تھے تاہم برطانوی میڈیا میں کبھی بھی یہ ریکارڈنگ نشر نہیں کی گئی۔ برطانوی ٹی وی چینل فور پر یہ ڈاکومنٹری فلم چھ اگست کو نشر کی جائے گی۔لیڈی ڈیانا اکتیس اگست1997 کو فرانسیسی دارالحکومت پیرس میں پیش آنے والے ایک کار حادثے میں ہلاک ہو گئی تھیں۔
