لاہور (کرائم رپورٹر) شادمان کے علاقہ میں اہلخانہ کو اسلحہ کے زور پر یرغمال بنانے والے چار ڈاکو پولیس مقابلہ کے دوران پار جبکہ 18 سالہ راہگیر گولی لگنے سے زخمی جسے طبی امداد کیلئے ہسپتال پہنچا دیا گیا۔ پولیس اور ڈاکوﺅں کے درمیان تین گھنٹے تک جاری ، پولیس مقابلے سے علاقہ میں شدید خوف و ہراس پھیل گیا۔ تفصیل کے مطابق شادمان 669 اے ون کے رہائشی بابر خان اور احمد خان کے گھر رات گئے چار ڈاکو داخل ہوگئے۔ اور اسلحہ کے زور پر اہلخانہ کو ایک کمرہ میں بند کرکے لوٹ مار شروع کردی۔ چاروں ڈاکو لوٹ مار کے بعد فرار ہو رہے تھے کہ اس دوران دوسرے کمرہ میں موجود احمد خان نے رات گئے 15 پر کال کردی جونہی ڈاکو فرار ہو رہے تھے کہ گشت پر معمور پولیس کی گاڑی موقع پر پہنچ گئی جنہیں دیکھتے ہی ڈاکوﺅں نے اندھا دھند فائرنگ شروع کردی۔ پولیس کی جوابی فائرنگ سے ڈاکو دوبارہ گھر میں داخل ہوگئے اور گھر میں موجود اہلخانہ کو ڈھال بناتے ہوئے پولیس سے مقابلہ شروع کردیا۔ پولیس اور ڈاکوﺅں کے درمیان تقریباً تین گھنٹے تک جاری فائرنگ کے باعث علاقہ میں شدید خوف و ہراس پھیل گیا۔ قریبی رہائشی خوفزدہ ہو کر دبک گئے۔ ملزمان کی طرف سے فائرنگ کا سلسلہ بند ہونے پر پولیس نے قریب جا کر دیکھا تو چاروں کی نعشیں خون میں لت پت پڑی تھیں جبکہ ایک راہگیر 18 سالہ عبداللہ گولی لگنے سے معمولی زخمی ہوگیا جسے طبی امداد کیلئے ہسپتال پہنچا دیا گیا جبکہ پولیس کے شیرجوان معجزانہ طور پر محفوظ رہے۔ ذرائع کے مطابق ڈاکوﺅں کے کپڑوں کی تلاشی کے دوران جیب سے ملنے والے کاغذات اور موبائل فون پولیس نے قبضہ میں لے لیے ہیں جن کی مدد سے ہلاک ہونے والے ڈاکوﺅں کی جلد شناخت ہو جائے گی۔ پولیس کے مطابق ڈاکو کار نمبر ایف بی 450 پر آئے تھے جسے قبضہ میں لے لیا گیا ہے۔
