اسلام آباد (مانیٹرنگ ڈیسک) کلبھوشن یادیو کے معاملے پر عالمی عدالت انصاف میں پاکستانی مو¿قف پیش کرنے کے لئے مشاورت کا آغاز ہوگیا۔ سیکرٹری خارجہ تہمینہ جنجوعہ‘ دفتر خارجہ کی ایڈیشنل سیکرٹری برائے اقوام متحدہ تسنیم اسلم اور دفتر خارجہ کے دیگر حکام نے اٹارنی جنرل اشتراوصاف سے ملاقات میں کیس کے قانونی پہلوﺅں پر مشاورت کی۔ دو گھنٹے طویل ملاقات میں عالمی عدالت انصاف کو پاکستان کی جانب سے دیا جانے والا ڈیکلریشن بھی زیربحث آیا۔ ڈیکلریشن کے مطابق پاکستان اپنے داخلی اور قومی سلامتی معاملات پر عالمی عدالت انصاف کا دائرہ کار تسلیم نہیں کرتا۔ عالمی عدالت انصاف پاکستان کے حوالے سے کسی ایسے معاملے کو نہیں سن سکتی جس پر پاکستان کا فریق ملک سے دوطرفہ معاہدہ موجود ہو۔ پاکستان اور بھارت کے درمیان قیدیوں تک رسائی کا معاہدہ پہلے ہی موجود ہے۔ ذرائع کے مطابق عالمی عدالت انصاف میں کلبھوشن یادیو کے معاملے پر بھارت کا مو¿قف انتہائی کمزور ہے۔ پاکستان عالمی عدالت انصاف میں 15 مئی کو اپنا مو¿قف پیش کرے گا۔
