اسلام آباد (خبر نگار خصوصی، اے پی پی) وزیراعظم میاں محمد نوازشریف نے وفاقی وزیر داخلہ چودھری نثار علی خان نے اہم ملاقات کی جس میں اہم امور پر تبادلہ خیالات کیا گیا۔ ذرائع کے مطابق ملاقات میں ڈان لیکس کے نئے نوٹیفکیشن پر بھی مشاورت کی گئی۔ وزیر داخلہ نے نوٹیفکیشن پر وزیراعظم کو اعتماد میں لیا۔ ذرائع کے مطابق وزیراعظم نوازشریف نے نئی نوٹیفکیشن میں فوج کے تحفظات دور کرنے کی ہدایت کی ہے۔ ذرائع کے مطابق وزیراعظم اور وزیرداخلہ کے درمیان ملاقات میں ملک کی سکیورٹی کی صورتحال پر بھی غور کیا گیا جبکہ پاک افغان سرحدی کشیدگی پر بھی بات چیت کی گئی۔ وزیراعظم محمد نواز شریف نے کہا ہے کہ پاکستان اومان کے ساتھ اپنے برادرانہ تعلقات کو بہت زیادہ اہمیت دیتا ہے۔ سلطان قابوس کی قیادت میں اومان تمام شعبوں میں مسلسل پیشرفت کر رہا ہے اور ان کی طرف سے پاکستان کے ساتھ تعلقات کو خصوصی اہمیت دیئے جانا قابل تحسین ہے۔ انہوں نے یہ بات اومان کے وزیر خارجہ یوسف بن علاوی بن عبداﷲ سے پیر کو وزیراعظم ہاﺅس میں گفتگو کرتے ہوئے کہی۔ وزیراعظم نے کہا کہ وزراءخارجہ کی سطح پر دونوں ممالک کے درمیان باقاعدہ سیاسی مکالمہ سیاسی، سٹریٹجک اور اقتصادی مفادات سمیت تمام شعبوں میں جامع تبادلہ خیال کے لئے مناسب فورم فراہم کرے گا۔ انہوں نے کہا کہ معیشت، تجارت و سرمایہ کاری کے شعبوں میں باہمی تعاون میں اضافہ کے وسیع امکانات موجود ہیں۔ وزیراعظم نے پاکستانی اور اومان کی بندرگاہوں کے درمیان قریب تر روابط تشکیل دینے میں اومان کی گہری دلچسپی کو سراہتے ہوئے کہا کہ پاکستان اور اومان کے درمیان سرکاری سطح پر اور کمرشل فیری سروس کے آغاز کا امکان مواصلاتی رابطے، عوامی سطح پر روابط اور پاک اومان دوطرفہ تجارت میں اضافہ کے لئے بالکل نیا شعبہ کھولے گا۔ انہوں نے کہا کہ ہم اومان میں اور خاص طور پر رائل اومانی آرمڈ فورسز میں ملازمت کرنے والے پاکستانیوں کا خصوصی خیال رکھنے پر اومان کی حکومت کے ممنون ہیں۔ یوسف بن علاوی بن عبداﷲ نے پرتپاک خیرمقدم پر وزیراعظم کا شکریہ ادا کرتے ہوئے وزیراعظم کی قیادت کو سراہا جنہوں نے پاکستان کو سماجی و اقتصادی ترقی، اقتصادی استحکام کی راہ پر گامزن اور ملک کے بنیادی ڈھانچے کو جدید خطوط پر استوار کیا ہے۔ وزیراعظم کے مشیر برائے خارجہ امور سرتاج عزیز بھی اس موقع پر موجود تھے۔
