لاہور: شعیب ملک نے ٹی20ورلڈکپ میں قومی ٹیم سے بلند توقعات وابستہ کرلیں۔
نیویارک اسٹیڈیم میں میڈیا سے گفتگو کرتے ہوئے سابق کپتان نے کہا کہ کھلاڑی اچھی فارم میں آگئے ہیں، انگلینڈ سے سیریز جیت گئے تو اعتماد میں مزید اضافہ ہو سکتا ہے، میگا ایونٹ میں بہتر آغاز کریں تو فائدہ ہوگا،لگتا ہے ٹیم آگے تک جائے گی، ہار جیت کھیل کا حصہ ہے، پلیئرز کو اعتماد دینا ہوگا۔
انھوں نے کہا کہ عماد وسیم اور محمد عامر کی اسکواڈ میں موجودگی پاکستان کیلیے خوش آئند ہے، صائم ایوب خطرات مول لے کر کھیلتا ہے،نوجوان بیٹر میں بہت ٹیلنٹ ہے،اگرہائی اسکورنگ گیم ہوئے تو انھیں ہی اوپننگ کرنا ہوگی، اگر 160تک رنز بن رہے ہوں تو بابر اعظم اور محمد رضوان کی جوڑی کا اننگز شروع کرنا بہتر ہوگا۔
انھوں نے کہا کہ امریکا میں نئی کنڈیشنز کو جلد سمجھ جانے والے کو فائدہ ملے گا، پاک بھارت مقابلے کو بطور کرکٹر ہم صرف ایک میچ کے طورپردیکھتے ہیں، میچ کے بعد دونوں ٹیموں کے کھلاڑی ساتھ بیٹھتے اور کھاتے پیتے ہیں۔
