ممبئی: بالی ووڈ کی معروف اداکارہ ادیتی راؤ حیدری نے اداکار سدھارتھ کے ساتھ شادی کی خبروں کی تردید کرتے ہوئے اپنی منگنی کی تصویر شیئر کردی۔
گزشتہ روز بھارتی میڈیا کی جانب سے یہ خبر سامنے آئی تھی کہ ادیتی راؤ حیدری اور سدھارتھ نے 26 مارچ کو تلنگانہ کے رنگناتھ سوامی مندر میں اپنے اہلخانہ اور قریبی رشتہ داروں کی موجودگی میں شادی کی۔
بھارتی میڈیا کا کہنا تھا کہ سدھارتھ اور ادیتی راؤ حیدری کی شادی کی کوئی تصویر سامنے نہیں آئی لیکن یہ جوڑا بہت جلد اپنی شادی کا باضابطہ اعلان کرے گا۔
شادی کی خبروں کے درمیان ادیتی راؤ حیدری نے اپنے آفیشل انسٹاگرام اکاؤنٹ پر اداکار سدھارتھ کے ہمراہ اپنی تصویر پوسٹ کی ہے جس میں دونوں اسٹارز اپنی منگنی کی انگوٹھیاں مداحوں کو دِکھا رہے ہیں۔
ادیتی راؤ حیدری نے اپنی پوسٹ کے ذریعے تصدیق کی کہ اُنہوں نے اداکار سدھارتھ سے منگنی کرلی ہے۔
بھارتی میڈیا کا کہنا ہے کہ ادیتی راؤ حیدری اور سدھارتھ نے 26 مارچ کو مندر میں شادی نہیں بلکہ منگنی کی تھی۔
واضح رہے کہ ادیتی راؤحیدری کی پہلی شادی اداکار ستیہ دیپ مشرا کے ساتھ ہوئی تھی۔ دونوں نے اپنی شادی کو خفیہ رکھا تھا لیکن بعد میں اس جوڑی کے درمیان طلاق ہوگئی تھی۔
دوسری جانب سدھارتھ نے سال 2003 میں میگھنا نارائن سے پہلی شادی کی تھی، اُن کی یہ شادی طویل عرصے تک نہیں چل سکی اور سال 2007 میں دونوں میں علیحدگی ہوگئی تھی۔
