گوجرہ: (ویب ڈیسک) امیر جماعت اسلامی سراج الحق نے کہا ہے کہ قوم نے چوروں کو آز ما لیا، اب قوم کے پاس جماعت اسلامی کے علاوہ کوئی چوائس نہیں ہے۔
گوجرہ میں تقریب سے خطاب کرتے ہوئے امیر جماعت اسلامی سراج الحق نے کہا کہ شہباز شریف آئی ایم ایف کا حکم مانتے ہیں، پٹرول کی قیمت میں 22 روپے اضافہ کر دیا گیا ہے، آج پٹرول، ڈیزل، بجلی سمیت ہر چیز مہنگی ہو چکی ہے، ملک میں ہر دن تباہی ہو رہی ہے، ملک میں غربت ناچ رہی ہے اور مایوسی ہے، شہباز شریف نے اپنے کپڑے نہیں بیچے مگر قوم کو بے لباس کیا۔
انہوں نے مزید کہا کہ روٹی، کپڑا، مکان کے نام پرعوام کے ساتھ مذاق کیا گیا، 170 ارب کے ٹیکسزعوام پر لگائے گئے ہیں، مریم نواز حکومت کے خلاف جلسے کر رہی ہے، استعفیٰ دینے، معافی مانگنے کے بجائے بہانے، دلائل تلاش کر رہے ہیں، عام آدمی کا زندگی گزارنا مشکل ہو گیا ہے، والدین کا علاج کرنا مشکل ہو گیا ہے اور ہر انسان کیلئے سانس لینا بھی مشکل ہو گیا ہے۔
سراج الحق نے کہا کہ بھوٹان، نیپال، افغانستان، بھارت ہم سے بہتر ہو گئے، چین کو اچھی قیادت ملی وہ معاشی طاقت بن گیا، پاکستان دنیا میں گندم پیدا کرنے والا 8 واں بڑا ملک ہے، نااہل حکمرانوں کی وجہ سے پاکستان کے بچوں کا مستقبل تباہ کر دیا گیا، جماعت اسلامی اقتدار میں آکر یکساں نصاب تعلیم نافذ کرے گی، ظلم اور جبر کے نظام کو ختم کرنے کیلئے جماعت اسلامی کا ساتھ دیں۔
