ریاض: (ویب ڈیسک) سعودی عرب میں ڈیجیٹل کارپوریشن آرگنائزیشن کی جنرل اسمبلی کا اجلاس منعقد ہوا جس میں پاکستان سمیت 13 ممالک کے وزراء نے شرکت کی اور دو طرفہ تعاون کو بڑھانے سمیت مختلف چیلنجز کو دور کرنے پر اتفاق کیا گیا . اجلاس میں پاکستان کی نمائندگی سفیر امیر خرم راٹھور نے کی ۔
اس موقع پر ڈیجیٹل کارپوریشن آرگنائزیشن کی سیکرٹری جنرل دماح یحییٰ کا کہنا تھا کہ ڈیجیٹل معیشت میں ترقی اور پائیداری کے حصول کے لئے تعاون کی ضرورت ہے اور آج کا اجلاس یقیناََ اس میں اہم کردار ادا کرے گا جبکہ ڈیجیٹل کارپوریشن آرگنائزیشن کے صدر سعودی وزیر مواصلات و انفارمیشن ٹیکنالوجی عبداللہ السواء کا کہنا تھا کہ گزشتہ دس برسوں کے دوران دنیا گلوبل ولیج بن چکی ہے ایسے میں ڈیجیٹل نظام کی اہمیت میں بے پناہ اضافہ ہوا ہے اور ہمیں ملکر جدید ٹیکنالوجی اور اس کے تقاضوں سے ہم آہنگ ہونے کی ضرورت ہے تاکہ تعلیم سمیت کاروباری سرگرمیوں اور دیگر امور کو بہتر انداز سے چلایا جاسکے۔
پاکستان کے سفیر امیر خرم راٹھور نے خطاب کرتے ہوئے ڈیجیٹل کارپوریشن آرگنائزیشن کی اہمیت اور اس کی افادیت کو خطے سمیت پوری دنیا کے لئے خوش آئند قرار دیا اور کہا کہ نہ صرف پاکستان اس میں اہم کردار ادا کرے گا بلکہ اس اہم پلیٹ فارم سے بھرپور استفادہ بھی حاصل کرے گا. ڈی سی او کے تیرہ ممالک کے وزراء نے دو طرفہ تعاون اور اس میں بہتری لانے پر اتفاق کیا.
