اسلام آباد: (ویب ڈیسک) اینٹی نارکوٹکس فورس کا منشیات کے خلاف کارروائیوں کا سلسلہ جاری ہے ، اسلام آباد ایئر پورٹ پر مختلف کارروائیوں میں بیرون ملک کیپسولز کے ذریعے منشیات اسمگلنگ کی کوشش ناکام بنا دی گئی ۔
اے این ایف ترجمان کا کہنا ہے کہ اسلام آباد ایئر پورٹ پر دبئی جانے والے ایک مسافر کے پیٹ سے 80 ہیروئن بھرے کیپسولز برآمد کیے گئے ہیں ، ملزم شمالی وزیرستان کا رہائشی ہے ۔
اے این ایف کے مطابق دوحہ جانے والے ایک مسافر کے پیٹ سے بھی 52 چرس، اور 31 آئس بھرے کیپسول برآمد کیے گئے ، ملزم کا تعلق مردان سے ہے ، دونوں واقعات میں اسمگلنگ میں ملوث مسافروں کو گرفتار کر لیا گیا ہے۔
ایک اور کارروائی میں اے این ایف نے اسلام آباد میں یونیورسٹی کے قریب اسلام آباد کے رہائشی ملزم سے 510 گرام چرس برآمد کرلی ، ملزم برآمدہ چرس طلباء کو فروخت کرتا تھا ۔
اے این ایف اور اے ایس ایف کی باچہ خان انٹرنیشنل ائیرپورٹ پشاور پر مشترکہ کارروائی ، شارجہ جانے والےملزم سے 70 گرام چرس برآمد کر لی گئی ہے ، سوات کا رہائشی ملزم گرفتارکرلیا گیا ۔
اے این ایف حکام کے مطابق لاہور میں ایمپریس روڈ پر واقع نجی کورئیر آفس میں ناروے سے بھیجے گئے پارسل میں سے 31 گرام ویڈ برآمد کر لی گئی ، ملزم گرفتار کر لیا گیا ۔
اے این ایف حکام کے مطابق ملزمان کیخلاف انسدادِ منشیات ایکٹ کے تحت مقدمات درج کرلیے گئے ہیں ۔
