گجرات: (ویب ڈیسک) مشیر وزیر اعظم فیصل کریم کنڈی نے کہا کہ اسٹیبلشمنٹ ہو چاہے عدلیہ اپنی حدود میں رہ کر کام کرنا چاہیے، ادارے اگر اپنے دائرہ کار میں رہ کر کام کریں تو ملک بھی ترقی کرے گا۔
گجرات چیمبر میں میڈیا سے گفتگو کرتے ہوئے فیصل کریم کنڈی کا کہنا تھا کہ میاں نوازشریف کی تیمارداری کیلئے لندن گیا تھا، سیاسی رہنما کہیں بیٹھتے ہیں تو سیاست پر ضرور بات ہوتی ہے، عسکری حکام یا کسی اور کیلئے کوئی پیغام نہیں لایا۔
مشیر وزیر اعظم نے کہا کہ کوئی اسمبلیاں تحلیل نہیں کرنے جا رہا، عمران خان نے ہر بات پر یوٹرن لیا، عمران خان کا کوئی ایک بیان بتا دیں جس پر وہ پورا اُترے ہوں، پنجاب کے ابھی بھی خدشات ہیں آپ کے وزیراعلیٰ پرویز الٰہی اسمبلیاں توڑے یا نہ توڑے۔
فیصل کریم کنڈی کا کہنا تھا کہ کے پی میں عمران خان کے ایم پی ایز ہمارے ساتھ رابطے میں ہیں، ہم سیاسی لوگ ہیں، کشمیر سے سندھ تک ہر ایک کے ساتھ رابطے میں ہوتے ہیں۔
گجرات چیمبر میں میڈیا سے گفتگو کے دوران فیصل کریم کنڈی نے کہا کہ زرداری صاحب نے ہمیشہ کہا ہے ہم ڈائیلاگ کی سیاست کرتے ہیں، پیپلز پارٹی نے کبھی کسی کو نہیں کہا ہم کسی کیساتھ ہاتھ نہیں ملانا چاہتے، عدم اعتماد کامیاب ہوئی تو وہی اتحادی جماعتیں جو پی ٹی آئی کیساتھ تھیں وہ ہمارے ساتھ ہیں۔
مشیر وزیر اعظم کا کہنا تھا کہ عمران خان کو ہم سیاست سکھائیں گے، ملکی معاشی حالات بہت اچھے نہیں ہیں، حکومت کیساتھ مل کر کام کر رہے ہیں، سیاسی لیڈر شپ کا اس وقت پتہ لگتا ہے جب ملک کو بحران سے نکالے۔
فیصل کریم کنڈی کا کہنا تھا کہ پنجاب میں ان ہاؤس تبدیلی کیلئے ایک ممبر بھی زیادہ ہوا تو ہم ایک منٹ بھی نہیں لگائیں گے، عدم اعتماد لے آئیں گے۔
