فیصل آباد: (ویب ڈیسک) پاکستان مسلم لیگ (ن) کے مرکزی رہنما طلال چودھری نے کہا ہے کہ عمران خان چھپ چھپ کر امریکی سفیر کو ویڈیو کالز کر رہے ہیں، امریکہ سے تعلقات کی بہتری کے لیے کوشاں ہیں۔
انہوں نے پریس کانفرنس سے خطاب کرتے ہوئے کہا کہ بشریٰ بی بی کے بیٹے ارسلا ن نے افواج کے خلاف مہم چلائی، چیف آف اسٹاف نے عمران خان کے کہنے پر بیان دیا لیکن آج چیف آف اسٹاف کو روٹی دینے والا کوئی نہیں ہے۔
وزیراعلیٰ پنجاب کو سخت تنقید کا نشانہ بناتے ہوئے طلال چودھری نے کہا کہ چودھری پرویز الٰہی کو اداروں سے نہیں اقتدار سے پیار ہے، تحریک انصاف نے ممنوعہ فنڈنگ لی۔
سابق وفاقی وزیر مملکت طلال چودھری نے چیئرمین پی ٹی آئی کو براہ راست مخاطب کرتے ہوئے کہا کہ عمران خان صاحب! تنقید اور بغاوت میں فرق ہوتا ہے، کارگل کے شہیدوں کو ہم نے اپنے سروں پر بٹھایا، انہوں نے ہیلی کاپٹر کے شہدا کے خلاف مہم چلائی۔
ن لیگ کے مرکزی رہنما طلال چودھری نے کہا کہ بار بار نواز شریف کا نام لے کر اپنی غلطیوں پر پردہ ڈالنا چاہتے ہیں، خیرات کے پیسے سے اپنا کچن چلاتے تھے، اپنے آپ کو نواز شریف سے ملا کر بے گناہ ثابت کرنے کی کوشش نہ کریں۔
پریس کانفرنس سے خطاب کرتے ہوئے طلال چودھری نے کہا کہ شہباز گل نے صرف دو تین دن کے لیے جیل کی یاترا کی ہے، آپ کے جرائم سے پردہ اٹھایا جائے گا۔
