کراچی: (ویب ڈیسک) پی آئی اے کے فضائی بیڑے میں نئے طیاروں کی شمولیت کا عمل جاری ہے، رواں سال کا دوسرا ائیربس 320 طیارہ شارجہ سے پاکستان پہنچ گیا۔
ترجمان پی آئی اے کے مطابق ائیربس 320 ساختہ طیاروں کی تعداد 14 ہوگئی، طیارہ نئی نشستوں، جدید اور آرام دہ کیبن سے لیس ہے، طیارہ اندرون ملک، ریجنل، گلف روٹس پر چلایا جائے گا۔
ترجمان پاکستان ایئر لائنز نے مزید بتایا ہے کہ طیارہ 6 سالہ ڈرائی لیز پرلیا، مدت کے بعد پی آئی اے ملکیت میں لے سکے گا۔
واضح رہے کہ پی آئی اے نے گزشتہ برس طیاروں کے حصول کا ٹینڈر کیا تھا، رواں سال دو طیارے پاکستان پہنچے، مزید دو آئندہ چند روز میں پہنچیں گے، پہلا جہاز 29 اپریل کو پاکستان آیا تھا، اب خدمات سرانجام دے رہا ہے۔
