لاہور : (ویب ڈیسک) پنجاب میں بجٹ پیش کرنا چیلنج بن گیا، گورنر نے بجٹ اجلاس ایوان اقبال میں 2 بجے طلب کرلیا، جبکہ سپیکر پرویز الہی نے اجلاس ایک بجے اسمبلی ہال میں بلا لیا۔
دو روز سے پنجاب حکومت اسمبلی میں آئندہ مالی سال کا بجٹ پیش نہ کرسکی، گورنر پنجاب نے بجٹ اجلاس ایوان اقبال میں طلب کرلیا جبکہ اسپیکر کے مطابق اجلاس اسمبلی ہال میں ہی ہوگا۔
گزشتہ روز گورنر پنجاب محمد بلیغ الرحمان نے پنجاب اسمبلی کا 40 واں اجلاس برخاست کر دیا تھا جبکہ اسمبلی کا 41 واں اجلاس سہ پہر 2 بجے ایوان اقبال طلب کرلیا تھا۔
دوسری جانب سپیکر پرویز الہی نے کہا ہے کہ گورنر کا سیشن برخاست کرنے کا اختیار ختم ہوچکا،اجلاس کی کارروائی ایک بجے اسمبلی ہال میں ہی ہوگی۔
چودھری پرویز الہیٰ نے کہا ہے اسپیکر کے ہوتے ہوئے ڈپٹی اسپیکر کارروائی نہیں چلا سکتا، اجلاس بلانے کا طریقہ کار طے ہے، سیشن بلانے کیلئے گورنر سیکرٹری اسمبلی کو لکھے گا، انہوں نے پہلے غلط الیکشن کرایا آج دوسرا بد نما داغ اپنے ماتھے پر لگا لیا۔
راجہ بشارت کا کہنا تھا حکومت کو غیرآئینی اقدام نہیں اٹھانے دیں گے، سبطین خان اور میاں اسلم اقبال نے کہا کسی اور عمارت میں اجلاس بلایا نہیں جاسکتا۔
ادھر صوبائی وزیر عطا تارڑ نے کہا ہے کہ گورنر نے آئینی ذمہ داری نبھاتے ہوئے اجلاس طلب کیا، اپوزیشن کو عوام کی پرواہ نہیں۔
اویس لغاری کا کہنا تھا آئین پانی کی طرح ہوتا ہے، اپنا راستہ خود نکالتا ہے، ہم عوام کو جوابدہ ہیں۔
