پنجاب اسمبلی کے افسران کے خلاف پولیس کا ایکشن جاری ہے، پولیس نے اسمبلی کے ڈائریکٹر سیکورٹی میجر ریٹائرڈ فیصل سمیت مزید افسران کو گرفتار کر لیا۔
ترجمان پنجاب اسمبلی کے مطابق اسمبلی افسران کے خلاف پولیس کا بلاجواز آپریشن جاری ہے، ان کی مسلسل گرفتاریاں کی جارہی ہیں۔ ترجمان کے مطابق پنجاب اسمبلی کے ڈائریکٹر سکیورٹی اینڈ انٹیلی جنس میجر ریٹائرڈ فیصل حسین کو پولیس نے گرفتار کر لیا ہے، میجر ریٹائرڈ فیصل ضمانت ہر ہیں، ضمانت کے باوجود پولیس نے انکو حراست میں لے لیا۔
پنجاب اسمبلی کے سیکورٹی اہلکار سہیل شہزاد، لیاقت علی ، محمد طبیب اور اسامہ کو بھی گرفتار کر لیا گیا۔ سیکرٹری پنجاب اسمبلی محمد خان بھٹی کی گرفتاری کے لئے پولیس کے چھاپے مسلسل جاری ہیں۔ سیکرٹری اسمبلی کی رہائش گاہ کے باہر پولیس کی بھاری نفری لگا دی گئی ہے۔
ترجمان پنجاب اسمبلی کے مطابق گزشتہ روز بھی پنجاب اسمبلی کے ریسرچ افسر شہباز حسین اور دو سکیورٹی افسران کو حراست میں لیا گیا تھا۔ سپیکر پنجاب اسمبلی چوہدری پرویز الہی کے پرسنل سٹاف افسر کو گرفتار کرنے کے لئے بھی چھاپے مارے جا رہے ہیں۔ پولیس کی جانب سے غیر قانونی طور پر پنجاب اسمبلی سٹاف کی گرفتاریوں اور چھاپوں کا سلسلہ جاری ہے۔
