ٹیکساس: (ویب ڈیسک) جیسی کرنی ویسی بھرنی کے مصداق ایک بوڑھی خاتون سے کار چھیننے والا مجرم کچھ دیر بعد اسی کار کے حادثے میں ہلاک ہوگیا۔
ٹیکساس کے شہر سان اینٹونیو میں 74 سالہ بزرگ خاتون چند روز قبل پیٹرول پمپ پر ایندھن بھروانے جارہی تھی کہ ایک شخص نے ان سے کار چھیننے کی کوشش کی۔ خاتون شرلین ہرنینڈز نے مزاحمت دکھائی تو بے رحم شخص نے ان پر شدید تشدد کیا۔
تفصیلات کے مطابق حملہ آور چور نے کار کے اندر گھنس کر خاتوں سے چابی چھیننے کی کوشش کی اور مزاحمت پر ان کے چہرے پر تشدد کیا۔ یہ منظر دیکھ کر قریب موجود تین افراد نے مداختلت اور مدد کی بے سود کوشش کی لیکن اس دوران ڈاکو خاتون کی کار چھین کر فراٹے بھرتا ہوا فرار ہوگیا۔
کچھ ہی دیر بعد پولیس وہاں پہنچی اور اسی سمت میں چھینی گئی کار تلاش کرنا شروع کردی جہاں مجرم بھاگا تھا۔ پولیس کچھ دور ہی پہنچی تھی کہ انہوں نے دیکھا کہ وہی کار ایک حادثے میں تباہ ہوچکی ہے اور اس سے دھواں اٹھ رہا ہے۔ اس کے اندر ایک شخص زخموں سے چور مرا ہوا تھا جس کے متعلق کہا جارہا ہے کہ وہ کار چور کرنے والا مبینہ ڈاکو ہے۔
شرلین نے اس خبر کے بعد کہا کہ جو ’برے کام کا نتیجہ برا ہوتا‘ ہے لیکن انہیں مجرم کے ہلاک ہونے پر افسوس ہے۔ انہوں نے کہا کہ مجرم نے ان پر تشدد کرکے چہرہ خراشوں سے بھر دیا تھا اور اس بدلہ خدا نے لیا ہے۔
شرلین اپنی پیرانہ سالی کے باوجود کام کرتی ہے اور اپنی کار میں دفتر جاتی ہے۔ اب ان کی کارتباہ ہوچکی ہے ۔ ان کے ساتھیوں نے نئی کار کے لیے انٹرنیٹ چندہ مہم شروع کی ہے جس میں اب تک 30 ہزار ڈالر جمع ہوچکے ہیں۔
