مسلم لیگ(ن) پنجاب کی ترجمان عظمیٰ بخاری نے کہا کہ الیکشن کمیشن نے بھی آج میرے مؤقف پر مہر لگادی ہے۔
تفصیلات کے مطابق مسلم لیگ(ن) پنجاب کی ترجمان عظمیٰ بخاری نے عثمان بزدار کے الیکشن کمیشن کا نوٹس ملنے پر ردعمل دیتے ہوئے کہا کہ مجھے نوٹس بھیجنے والے کو خود دو نوٹس مل گئے ہیں۔
انہوں نے کہا کہ عثمان بزدار کو پہلا نوٹس 9 مئی اور دوسرا نوٹس 8 جون کو ملا ہے ، جس کا جواب ابھی تک نہیں دیا گیا،دوسروں سے حساب مانگنے والوں کا یوم حساب قریب ہے۔
مسلم لیگ(ن) پنجاب کی ترجمان نے کہا کہ الیکشن کمیشن نے عثمان بزدار کو اثاثوں میں واضع فرق پر نوٹس بھیجے ہیں،ان کے اثاثوں میں سو گنا اضافہ ہوا ہے ، الیکشن کمیشن نے بھی وہی بات کی جو میں نے اپنی پریس کانفرنس میں کی۔
عظمیٰ بخاری نے کہا کہ عثمان بزدار کے 2018میں اثاثے اور تھے اور آج ان میں کئی گنا اضافہ ہو چکا ہے ، عثمان بزدار تونسہ سے لاہور طاہر بشیر چیمہ کی پراڈو پر پہنچے لیکن آج عثمان بزدار پچاس گاڑیوں کے پروٹوکول کے ساتھ تونسہ جاتے ہیں۔
انہوں نے کہا کہ بزدار صاحب کو ایک ایک پائی کا حساب دینا ہوگا ، ابھی جعلی شراب لائسنس اور گندم کی چوری اور چینی سبسڈی اور ڈکیتی میں حصہ وصولی کا بھی حساب دینا ہے۔
