کورونا مریضوں کو آکسیجن کی فراہمی یقینی بنانےکے لیے اسلام آباد کے بڑے سرکاری اسپتالوں میں معمول کے طے شدہ آپریشن مؤخر کر دیے گئے۔
انتظامیہ نے کہا ہےکہ کورونا مریضوں کو آکسیجن کی فراہمی کو یقینی بنانےکے لیے اسلام آباد کے تمام بڑے سرکاری اسپتالوں میں طے شدہ سرجریز بند کر دی گئی ہیں ۔
سی ڈی اے اسپتال ،نیرم اور گورنمنٹ سروسز اسپتال میں بھی طے شدہ آپریشن بند کردیے گئے جب کہ پمز اور پولی کلینک میں بھی طے شدہ سرجریز پہلے ہی بند کی جا چکی ہیں۔
انتظامیہ کا کہنا ہےکہ طے شدہ سرجریز آئندہ نوٹیفیکشن تک بند رہیں گی ،طے شدہ سرجریز بند کرنے کا مقصد کورونا مریضوں کو آکسیجن کی فراہمی یقینی بنانا ہے۔
انتظامیہ کے مطابق اس وقت پمز میں 151 مریض کورونا وارڈز ،11 ایمرجنسی میں اور پمز میں 7 مریض وینٹیلیٹرز پر ہیں،پولی کلینک میں کورونا مریضوں کے لیے مختص وینٹیلٹرز فل ہیں ،جب کہ کورونا وارڈز میں 28 مریض زیر علاج ہیں ۔
سی ڈی اے اسپتال میں کورونا کے 42 اورگورنمنٹ سروسز اسپتال کے کورونا وارڈ میں 15 مریض زیرعلاج ہیں ۔
