وزیرِ اعظم عمران خان نے کہا ہے کہ احساس “کوئی بھوکا نہ سوئے” پروگرام کامیابی کے بعد پاکستان بلکہ دنیا بھر میں اپنی مثال آپ ہوگا۔
تفصیلات کے مطابق وزیرِ اعظم عمران خان کی زیر صدارت اجلاس ہوا جس میں احساس، “کوئی بھوکا نہ سوئے” اقدامات پر وزیراعظم کو بریفنگ دی گئی۔
ڈاکٹر ثانیہ نشتر نے وزیرِ اعظم کو منصوبے پر تفصیلی بریفنگ دیتے ہوئے کہا کہ احساس کے ذریعے غذائی قلت کے خطرے سے دوچار علاقوں کی نشاندہی کرکے کھانے کی فراہمی کو یقینی بنایا جائے گا۔
ثانیہ نشتر نے وزیرِ اعظم کو احساس ڈونر مینیجمنٹ سسٹم پر بھی بریفنگ دی اور کہا کہ انفرادی اور اداروں کی سطح پر مرضی کے مطابق ڈونیشن دینے اور خرچ کی تفصیل خودکار اور ڈیجیٹل طریقے سے ڈونر تک جا سکے گی جبکہ اس نظام کی مکمل تیاری کے بعد اس کا آغاز رواں سال کی پہلی سہ ماہی کے اختتام تک کر دیا جائے گا
اجلاس کی صدارت کرتے ہوئے وزیرِ اعظم عمران خان نے مستحق افراد کو کھانا فراہم کرنے کیلئے پیش کی گئی تجاویز کو سراہا
وزیراعظم عمران خان نے کہا کہ لوگ معاشی مشکلات کا شکار ہو کر دو وقت کی روٹی سے محروم ہیں، ایسے علاقوں کی نشاندہی کو ترجیحی بنیادوں پر یقینی بنایا جائے۔
جامع منصوبہ بندی سے ایسا نظام لایا جائے جس سے مستحقین تک رسائی براہ راست اور آسان ہو جبکہ احساس “کوئی بھوکا نہ سوئے” پروگرام کامیابی کے بعد پاکستان بلکہ دنیا بھر میں اپنی مثال آپ ہوگا۔
