اسلام آباد: صدر مملکت ڈاکٹر عارف علوی نے وزیر اعظم عمران خان کے استعفے کے اپوزیشن کے مطالبے کو بلا جواز قرار دیتے ہوئے امید کا اظہار کیا ہے کہ موجودہ اسمبلی اور حکومت اپنی پانچ سالہ آئینی مدت پوری کرے گی۔
ایوان صدر میں معذور افراد کے مسائل سے متعلق سینئر صحافیوں کے ساتھ فکری سیشن کے دوران گفتگو کرتے ہوئے صدر نے اعلان کیا کہ نہ تو حکومت استعفی دے گی اور نہ ہی اسمبلیاں تحلیل کی جائیں گی۔
ڈاکٹر عارف علوی نے انتخابی اصلاحات کے مسئلے پر قومی مکالمے کی ضرورت پر زور دیا۔
ان کا موقف تھا کہ قومی احتساب بیورو (نیب) کے کردار پر بحث کیے بغیر قومی بات چیت نامکمل ہوگی اور ملک سے بدعنوانی کا خاتمہ بھی اس بحث کا ایک حصہ ہونا چاہیے۔
ایک سوال کے جواب میں صدر نے کہا کہ وزیر اعظم وقت اور ان لوگوں کے بارے میں فیصلہ کریں گے جن کے ساتھ بات چیت کی جانی چاہیے۔
جب ان کی توجہ پاکستان تحریک انصاف (پی ٹی آئی) کے دھرنے کی طرف مبذول کی گئی جس کے دوران عمران خان نے اس وقت کی فوجی قیادت سے بات چیت کی تھی تو ڈاکٹر عارف علوی نے کہا کہ فوج کے ساتھ بات چیت پاکستان مسلم لیگ نواز (مسلم لیگ ن) کی حکومت کی درخواست پر ہوئی اور یہ آئینی پیرامیٹرز تک محدود رہی۔
کسی کا نام لیے بغیر صدر نے الزام عائد کیا کہ گزشتہ دو سالوں سے ملک کے سیاسی نظام کو غیر مستحکم کرنے کی کوششیں کی جارہی ہیں۔
صدر کا یہ بیان اپوزیشن پاکستان ڈیموکریٹک موومنٹ (پی ڈی ایم) کے رہنماؤں کی جانب سے گڑھی خدا بخش میں ایک جلسہ عام کے دوران ایک بار پھر وزیر اعظم سے 31 جنوری 2021 تک عہدہ چھوڑنے یا اسلام آباد کی طرف فیصلہ کن لانگ مارچ کا سامنا کرنے کے بیان کے بعد سامنے آیا۔
