وزیراعظم عمران خان نے پارٹی ترجمانوں کو ہدایت کی ہے کہ فوج سمیت تمام اداروں کا دفاع کیا جائے ، فوج کادفاع قومی ذمہ داری ہے ،اپوزیشن کو اینٹ کا جواب پتھر سے دیں اور مولانا فضل الرحمن کی مبینہ کر پشن سامنے لا ئیں ۔ذرائع کے مطابق وزیراعظم عمران خان کی صدارت میں پارٹی ترجمانوں اور رہنماؤں کا اجلاس ہوا،اجلاس میں ملکی سیاسی و معاشی صورتحال اور دیگر امور پر غور کیا گیا، ذرائع کے مطابق وزیر اعظم نے پارٹی رہنماؤں کو فوج اور دیگر اداروں کے دفاع کی ہدایت کرتے ہوئے کہا کہ فوج مخالف بیانیے کا مؤثر جواب دیا جائے ، غیرملکی این جی اوز کے سپانسرڈ لوگ سوشل میڈیا پر اداروں کے خلاف مہم چلا رہے ہیں، وزیراعظم کا کہنا تھاکہ سوشل میڈیا پر اداروں کو بدنام کرنے والوں کا پیچھا کریں گے ، انہوں نے اداروں اور شخصیات کے خلاف مہم چلانے والوں کا کھوج لگانے کی ہدایت بھی کی، اجلاس میں فیصلہ کیا گیا کہ فوج مخالف بیانات پر جے یو آئی ف کے رہنما مفتی کفایت اللہ کیخلاف کارروائی کی جائے گی،ذرائع کا کہنا ہے کہ وزیر اعظم نے ترجمانوں کو مولانا فضل الرحمن کی مبینہ کرپشن بے نقاب کرنے کی بھی ہدایت کی اور کہا کہ عوام کو آگاہ کریں کہ مولانا نے اثاثے کیسے اور کتنے بنائے ،وزیراعظم نے ترجمانوں کو اپوزیشن کو آڑے ہاتھوں لینے کی ہدایت کرتے ہوئے کہا کہ وزرا اپنی کارکردگی عوام کے سامنے لائیں اورسینیٹ اجلاس میں وزرا اپوزیشن کو بھرپور جواب دیں،ان کا کہنا تھا کہ اپوزیشن کو اینٹ کا جواب پتھر سے دیں،اپوزیشن کے ٹولے کو ملک نہیں اپنے مقاصد عزیز ہیں،اپوزیشن کی کسی تحریک کا دباؤ نہیں،اپوزیشن کا واحد مقصد این آر او ہے ، جو نہیں ملے گا، عمران خان نے کہاکہ پی ڈی ایم ہمارے لئے مسئلہ نہیں، عوامی مسائل پر توجہ ہے ، اپوزیشن کی بلیک میلنگ میں نہیں آئیں گے ، پی ڈی ایم کی حکومت مخالف تحریک کا کوئی مستقبل نہیں، بات چیت اور مسائل کے حل کا بہترین فورم پارلیمنٹ ہے ، اپوزیشن نے پارلیمنٹ کو ذاتی مفادات کے لئے استعمال کیا،انہوں نے کہا کہ اپوزیشن بھی حکومت کی طرح عوام کو جوابدہ ہے ، اپوزیشن نے ڈھائی سالوں میں قانون سازی میں حصہ نہیں لیا
