وفاقی وزیر اطلاعات شبلی فراز کا کہنا ہے کہ وزیر اعظم عمران خان ملکی دولت لوٹنے والوں کے اعصاب پر سوارہیں۔
سماجی رابطے کی ویب سائٹ ٹوئیٹر پر جاری بیان میں وفاقی وزیر اطلاعات شبلی فرا ز نے کہا کہ قانون کی حکمرانی کے دعویداربلاول صاحب اپنے انکل نواز شریف سے کہیں کہ واپس عدالت میں پیش ہوکر قانون کی حکمرانی کا عملی ثبوت دیں۔
شبلی فراز نے کہا کہ بلاول اس کرپٹ ورثے کےنمائندے ہیں جنہوں نے ملک کی بنیادوں کوکھوکھلا کیا۔پیپلز پارٹی کو بھٹو کی وفاقی جماعت سے علاقائی جماعت میں بدلنے کا سہرا بلاول اور ان کے والد کےسر ہے۔
ان کا مزید کہنا تھا کہ سوئس اکاؤنٹس بھرنے اور سرے محل تعمیر کرنے والے وکلاء سے کس منہ سے مخاطب ہو رہے؟قوم کا مال تو واپس کرنا ہی پڑے گا، کرپشن سے ملک کی بنیادیں کھوکھلی کرنے کا جواب تو دینا ہی پڑے گا۔
وفاقی وزیر اطلاعات نے کہا کہ زرداری صاحب اقتدار میں بھلے چنگے اور اپوزیشن میں بیمار ہو جاتے ہیں۔نوازشریف اور آصف زرداری دونوں کی بیماری کا سبب ایک ہی ہے۔قوم سے یہ دھوکہ دہی اب نہیں چلے گی۔
