(ویب ڈیسک)وزیر اعظم عمران خان کا کہنا ہے کہ راوی ریور فرنٹ اربن ڈویلپمنٹ منصوبہ لاہور شہر کی بحالی اور بڑھتی ہوئی آبادی کی ضروریات کو پورا کرے گا۔
تفصیلات کے مطابق وزیراعظم عمران خان کی زیر صدارت اہم اجلاس ہوا۔
اجلاس میں وزیراعلیٰ پنجاب سردار عثمان بزدار، چیئر مین نیا پاکستان ہاؤسنگ اینڈ ڈویلپمنٹ اتھارٹی لیفٹنٹ جنرل (ر) انور علی حیدر ، چیف سیکرٹری پنجاب، چیئرمین ایف بی آر ، چیئرمین روڈا (راوی اربن ڈویلپمنٹ اتھارٹی)، سرمایہ کاروں اور تعمیراتی شعبے سے وابستہ معروف شخصیات شریک ہوئے۔
اجلاس میں راوی ریورفرنٹ اربن ڈویلپمنٹ پراجیکٹ پر عمل درآمد میں پیش رفت کا جائزہ لیا گیا اور پراجیکٹ کے مختلف مراحل اور ان کی مقرر کردہ ٹائم لائنز کے حوالے سے تفصیلی گفتگو کی گئی۔
سرمایہ کاروں اور تعمیراتی شعبے سے وابستہ معروف شخصیات کی جانب سے منصوبے میں بھرپور دلچسپی کا اظہار کیا گیا۔
وزیر اعظم عمران خان نے کہا کہ راوی ریور فرنٹ اربن ڈویلپمنٹ منصوبہ لاہور شہر کی بحالی اور بڑھتی ہوئی آبادی کی ضروریات کو پورا کرے گا۔پانی کی قلت کو دور کرنے اور لاہور سمیت صوبے بھر میں معاشی عمل کو تیز کرنے کے حوالے سے یہ کلیدی منصوبہ ہے۔
عمران خان نے کہا کہ منصوبے پر عمل درآمد سے لاہور شہر کی ضروریات پوری ہوں گی۔منصوبے کی بدولت نوکریوں اور معاشی سرگرمیوں کے بے انتہا مواقع بھی پیدا ہوں گے۔
انہوں نے مزید کہا کہ منصوبے پر مقررہ ٹائم لائنز میں عمل درآمد حکومت کی ترجیح ہے۔
وزیراعلیٰ پنجاب نے کہا کہ وزیراعظم کے ویژن اور حکومتی ترجیحات کو مد نظر رکھتے ہوئے اعلیٰ سطح پر اس منصوبے میں ہونے والی پیش رفت پر نظر رکھی جا رہی ہے۔
عثمان بزدار کاکہنا تھا کہ عمل درآمد کے حوالے سے طے شدہ اہداف کی مقررہ وقت میں تکمیل کو یقینی بنایا جائے گا۔
