کراچی(ویب ڈیسک) کورنگی میں نشے میں دھت ڈرائیور سے گاڑی بے قابو ہونے کے باعث فٹ پاتھ پر سوئے افراد پر چڑھ گئی جس کے باعث ایک معمرشخص جاں بحق جبکہ 7 افراد زخمی ہوگئے۔زمان ٹاﺅن کے علاقے میں انڈس اسپتال کے قریب سیاہ رنگ کی ٹویوٹا کرولا گاڑی تیز رفتاری کے باعث ڈرائیور سے بے قابو ہوکر رکشے کو روندتے ہوئے فٹ پاتھ پر سوئے افراد پر چڑھ گئی جس کے نتیجے میں 8 افراد زخمی ہو گئے جنہیں فوری طور پر اسپتال منتقل کردیا گیا جہاں ایک 50 سالہ شخص دوران علاج دم توڑ گیا۔پولیس نے بروقت کارروائی کرتے ہوئے گاڑی کے ڈرائیور عامر شہزاد ولد محمد رفیع ، اس کے دو دوست تنویر ولد نصیر احمد اور بلال بھٹی ولد محمد عرفان بھٹی کو گرفتار کرکے تھانے منتقل کردیا جبکہ ایک دوست طلحہ موقع سے فرار ہونے میں کامیاب ہو گیا۔ایس ایچ او زمان ٹاﺅن بابر حمید نے ذرائع کو بتایا کہ گرفتار افراد لانڈھی کے رہائشی ہیں جو واقعے کے وقت نشے میں دھت تھے اور لانڈھی سے کسی دوست کی شادی میں شرکت کرنے کے بعد کلفٹن جا رہے تھے۔ متوفی کے اہلخانہ کے ملنے کے بعد مقدمہ درج کے باضابطہ تفتیش شروع کی جائے گی۔ڈرائیور عامر شہزاد نے بتایا کہ دوست کی شادی میں شرکت کرنے کے بعد کلفٹن کھانا کھانے جا رہا تھا کہ راستے میں دودھ والے کو بچاتے ہوئے گاڑی فٹ پاتھ پر چڑھ گئی، انھوں نے گاڑی رینٹ اے کار سے لی تھی اور وہ خود گارمنٹس فیکٹری میں ملازمت کرتا ہے۔
