لاہور (ویب ڈیسک) صوبائی وزیر اطلاعات فیاض الحسن چوہان نے کہا ہے کہ سابق وزیراعظم نواز شریف کی طبیعت نہیں، نیت خراب ہے۔ صرف گردے میں معمولی سی پتھری سامنے آئی ہے۔الحمرا ہال لاہور میں میڈیا سے گفتگو کرتے ہوئے فیاض الحسن چوہان کا کہنا تھا کہ تمام رپورٹس سے ثابت ہو گیا ہے کہ نواز شریف کو ماضی قریب میں کوئی ہارٹ اٹیک نہیں ہوا۔انہوں نے کہا کہ تین میڈیکل بورڈز بنائے گئے ہیں لیکن انہیں تسلی نہیں ہو رہی۔ کھودا پہاڑ اور نکلا چوہا، وہ بھی پتھری کی صورت میں صوبائی وزیر اطلاعات نے سابق وزیر داخلہ احسن اقبال کو پڑھا لکھا جاہل قرار دیا۔ان کا کہنا تھا کہ زرداری اور شہباز کی محبت ہر کسی کو دکھائی دے رہی ہے۔ نواز شریف کو ہم نے نہیں سپریم کورٹ نے چور قرار دیا ہے۔ رانا ثنا اللہ ہفتے میں تین بار فواد چودھری کو گالیاں نکالتے ہیں۔
