لاہور (شوبزڈیسک)تمغہ امتیاز اور پرائیڈ آف پرفارمنس کی حامل فلم انڈسٹری کی معروف اداکارہ وگلو کارہ ملکہ ترنم نور جہاں کی 18ویں برسی آج23ملک بھر میں منائی جا ئے گی۔ اس سلسلہ میں تمام نگار خانوں ، آرٹس کونسلز میں تعزیتی ریفرنسز منعقد کئے جائیں گے جبکہ ان کے مداح و پرستار بھی انہیں خراج عقیدت پیش کرنے کےلئے خصوصی تقاریب کا اہتمام کریں گے۔ملکہ ترنم نور جہاں 21ستمبر1926ءکو قصور میں پیدا ہوئیں۔ ان کا اصل نام اللہ وسائی تھا جبکہ نور جہاں ان کا فلمی نام تھا۔ فنی کیرئیر کا آغاز 1935 میں ”پنڈ دی کڑی “سے کیا ۔ قیام پاکستان کے بعدوہ شوہر شوکت حسین رضوی کےساتھ ممبئی سے کراچی شفٹ ہو گئیں۔1957ء میں انہیں شاندار پرفارمنس کے باعث صدارتی ایوارڈ تمغہ امتیاز اور بعد ازاں پرائیڈ آف پرفارمنس سے بھی نوازا گیا ۔1965ءکی جنگ میں انہوں نے” میرےا ڈھول سپاہیا ، اے وطن کے سجیلے جوانوں ، ایہہ پتر ہٹاں تے نہیں وکدے ، او ماہی چھیل چھبیلا، یہ ہواﺅں کے مسافر ، رنگ لائے گا شہیدوں کا لہو، میرا سوہنا شہر قصورنی“ سمیت بے شمار ملی نغمے گا کر قوم اور فوج کے جوش و ولولہ میں اضافہ کیا۔ انہوںنے مجموعی طور پر 10ہزار سے زائد غزلیں و گیت گائے جن میں ان کی گائی غزل ”مجھ سے پہلی سی محبت میرے محبوب نہ مانگ “بے پنا ہ ہٹ ہوئی جس نے ملکہ ترنم کو کامیابیوں کے نئے سفر پر گامزن کر دیا ۔
