جرمنی سے مقابلہ آسان نہیں ،جیت کیلئے اٹیکنگ ہاکی کھیلنا ہوگی:شہناز

راولپنڈی(آئی ا ین پی)پاکستان ہاکی ٹیم کے سابق ہیڈ کوچ شہناز شیخ نے کہا ہے کہ قومی ٹیم کیلئے ورلڈ کپ کا پہلا میچ بہت اہمیت کا حامل ہے، جرمنی کے خلاف کامیابی حاصل کرنے کیلئے مربوط حکمت عملی کے ساتھ میدان میں اترنا ہوگا، اگر ہم پہلا میچ جیت جاتے ہیں تو اگلے راﺅنڈ میں جگہ بنانا آسان ہو جائے گا۔ میڈیا سے گفتگو کرتے ہوئے انہوں نے کہا کہ پاکستانی ٹیم ورلڈ کپ میں شرکت کرنے والی تمام ٹیموں سے زیادہ میچور ہے۔ماڈرن ہاکی میں پلیئنگ الیون اور کوچنگ سٹاف میں ہم آہنگی اچھے نتائج کا پیش خیمہ ہوتی ہے۔ انہوں نے بتایا کہ قومی ٹیم کے تین بڑے مسائل ہیں جن پر ابھی تک قابو نہیں پایا گیا، پاکستانی ٹیم گول کرنے کے مواقع بہت ضائع کرتی ہے۔دوسرا ڈی کے اندر مارکنگ بہت خراب ہوتی ہے جس سے مخالف ٹیم گول کر جاتی ہے۔ انہوں نے بتایا کہ اس وقت دنیا کی تمام ٹیمیں اٹیکنگ ہاکی کھیل رہی ہیں۔ارجنٹائن اور سپین کے میچ میں مکمل طور پر اٹیکنگ ہاکی کھیلی گئی اور مجموعی طور پر سات گول ہوئے، اس لئے قومی ٹیم کو جرمنی کے خلاف میچ میں اپنے دفاع کو مضبوط بناکر اٹیکنگ ہاکی کھیلنا ہو گی، اگرچہ رینکنگ میں جرمنی کی ٹیم بہت آگے ہے مگر پاکستانی ٹیم اسے شکست دینے کی بھرپور صلاحیت رکھتی ہے۔ شہناز شیخ نے کہا کہ اٹیکنگ ہاکی میں گول کیپر کا کردار بہت اہم ہوتا ہے۔جرمنی کے خلاف میچ میں گول کیپر کو غیر معمولی کھیل پیش کرنا ہوگا۔ اور اس کے ساتھ ساتھ پاکستانی ٹیم کو پنلٹی کارنر پر بہت زیادہ توجہ دینا ہوگی۔ انہوں نے بتایا کہ کسی بھی ٹیم کیلئے ٹورنامنٹ کا پہلا میچ بہت اہم ہوتا ہے، اگر ہماری ٹیم جرمنی کو ہرا دیتی ہے تو اسے اگلے راﺅنڈ کیلئے کوالیفائی کرنا آسان ہو جائے گا۔