ممبئی (ویب ڈیسک)بالی وڈ میں اسٹارز کی شادیوں کا سلسلہ جاری ہے اور دپیکا پڈوکون اور رنویر سنگھ کی شادی کے بعد اب اداکارہ پریانکا چوپڑا اور امریکی گلوکار نک جونس بھی عنقریب رشتہ ازدواج میں منسلک ہونے جا رہے ہیں، جن کی شادی کی تقریبات کی تفصیلات منظرعام پر آگئیں۔پریانکا چوپڑا اور نک جونس کی شادی 2 دسمبر کو جودھپور کے عمید بھاوان پیلس میں ہندو رسم و رواج کے مطابق ہوگی جبکہ شادی کی تقاریب کا سلسلہ 29 نومبر سے شروع ہوجائے گا۔ بھارتی نیوز ویب سائٹ ہندوستان ٹائمز کی ایک رپورٹ کے مطابق دپیکا اور رنویر کی طرح پریانکا چوپڑا اور نک جونس کی شادی کی استقبالیہ تقاریب بھی بڑے پیمانے پر منعقد کی جائیں گی۔رپورٹ کے مطابق پریانکا اور نک جونس کی شادی کی استقبالیہ تقاریب ممبئی اور دہلی میں ہوں گی، جن میں دوست احباب سمیت بالی وڈ اسٹارز کی شرکت یقینی ہے۔گزشتہ روز نک جونس بھی امریکا سے بھارت پہنچ گئے ہیں، جس پر ان کی منگیتر پریانکا نے انہیں خوش آمدید کہا اور اس موقع کی تصویر بھی انسٹاگرام پر شیئر کی۔واضح رہے کہ پریانکا چوپڑا نے نک جونس سے منگنی رواں برس اگست میں کی تھی۔منگنی کی رسم ممبئی میں پریانکا کے گھر میں ہوئی تھی، جس میں قریبی عزیر و اقارب نے شرکت کی تھی، بعدازاں منگنی کا جشن بھی منعقد کیا گیا، جس میں چند بالی وڈ ستارے شریک ہوئے تھے۔
