ملتان (میاں غفار سے) نوازشریف کی نااہلی اور شہبازشریف کی گرفتاری کے بعد مسلم لیگی اراکین اسمبلی میں اندرخانے فارورڈ بلاک پر کام شروع ہوچکا ہے اور اس حوالے سے پہلے مرحلے میں پنجاب سے تعلق رکھنے والے مسلم لیگی اراکین قومی اسمبلی آپس میں رابطے کررہے ہیں جبکہ ذرائع کے مطابق اس فارورڈ بلاک کا اعلان اس وقت ہوگا جب اس کے اراکین کی تعداد لیگی اراکین کے نصف سے زائد ہوگی اور اس طرح مسلم لیگ (ن) کا یہی فارورڈ بلاک ہی اصل مسلم لیگ سے تعداد میں زیادہ ہونے کی وجہ سے قومی اسمبلی میں پہلے مرحلے پر اپنا قائد حزب ِاختلاف چنے گا اور پھر مرحلہ وار پنجاب اسمبلی میں بھی حقیقی فارورڈ بلاک سامنے لائے جانے کی کوشش کی جائے گی۔ اس طرح پاکستان مسلم لیگ سے نوازشریف اور ان کے خاندان کے عنصر کا خاتمہ ہوجائے گا۔ ذرائع کے مطابق اس وقت اس مقصد کے لئے جنوبی پنجاب کے ایک سیاستدان سرگرم ہیں۔ لاہور ڈویژن سے بھی ایک رُکن قومی اسمبلی اندرونِ خانہ رابطوں میں لگے ہوئے ہیں اور وہ دیگر ممبران کو بھی یقین دلارہے ہیں کہ نوازشریف کے بعد اب سیاست سے شہبازشریف فیکٹر بھی ختم ہونے جارہا ہے لہٰذا اس موقع پر ہم خیال گروپ بناکر پارٹی قیادت کے معاملات سنبھال لئے جائیں اور کوئی ایسا نام سامنے لایا جائے جو اراکین اسمبلی کے ساتھ ساتھ پاکستانی اسٹیبلشمنٹ کو بھی قابلِ قبول ہو اور جس پر کوئی بڑا الزام بھی نہ ہو‘ نہ ہی وہ نیب سمیت دیگر تفتیشی اداروں کو مطلوب ہو۔ ذرائع کے مطابق اس صورتحال کے حوالے سے اگلے 2ماہ میں بہت کچھ واضح ہوجائے گا اور پنجاب سے کامیابی کے بعد دیگر صوبوں میں بھی مسلم لیگی اراکین اسمبلی سے رابطہ مہم شروع کی جائے گی۔
